Ыджыт Кочаын (Кочёвскöй округ) медодззаись чулалiс мастер-класс тупи-тап нима важ коми-пермяцкöй йöктан сьöртi. Сiйö чулöтiс «Мича асыв» нима народнöй ансамбль «Школа тупи-тап» велöтчан программа сьöртi, аркмöтöм Коми-Пермяцкöй этнокультурнöй центрöн Коми-Пермяцкöй округлöн сё во кежö.
«Тупи тап» — не просто йöктан, а ловья традиция, кöда мунö прапрабаббезсянь да деддэзсянь. Сыын отирлöн лов: коккезöн мунöм висьталö гаж йылiсь, аттьöалöм йвлiсь да корö кытшö. «Баббезным некöр эзö шуö сiйö танецöн, сiя пыр вöлi пляска — кокнит, ловья, мывкыда. Сыын и нывкалöн басöкыс, и мужиклöн выныс, и бодрость», — висьталö «Мича асыв» ансамбльлöн юралiсь Анна Теплоухова.
Мастер-класс вылын Коми-Пермяцкöй этнокультурнöй центрлöн йöктан студияись челядь велöтчисö ойвывся коми-пермяккез йöктанлöн ассямаэзö. Велöтiсö оськöввез да жесттэз, пырисö деревенскöй рытлöн атмосфераö, кытöн кöркö тупи-тап вöлi медшöр способöн сёрнитöм понда да гаж понда.
«Челядь чожа кутiсö движеннёэсö, быдтö нiя ны пытшкын ни. Кöсъямö, мый нiя одзлань пондасö используйтны сэтшöм опытсö асланыс творчествоын», - пасйисö аркмöтiссез.
«Школа тупи-тап» чулöтсьö медодззаись. Сылöн мог – тöдсöтны учöт томпöлöс кыв да культуралöн носителлезкöт, кольны да торйöтчыны одзлань коми-пермяккезлöн ассяма традицияэзкöт. Эд только ловья исполненнёын позьö кывны пляскалiсь настоящöй дух – кокнит, задорнöй, сьöлöмбурмöтан.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Вежалунся событиеэзлöн программнöй дирекция — Пермский дом народного творчества «Губерния».
Коми-Пермяцкöй округлöн сёвося фестиваллез йылiсь быдöс актуальнöй информациясö верматö тöдны сайт вылын да социальнöй сеттезын.
Русский