Отеллез пондiсö пыртын номернöй фондлöн оформленнёö коми-пермяцкöй стиль. «Парма», медтöдчана да медваж гостиница карын, медодззаöн вежис номеррезлiсь интерьеррез аутентичнöй стильö. Татöн сувтöтöны коми-пермяцкöй деревняэзiсь вайöм берся. Номеррезын сувтчывлiс ни РФ Народнöй артист Дмитрий Харатьян юбилейнöй мероприятиеэз коста, кöдна вöлiсö йитöмöсь Коми-Пермяцкöй округлöн сё вокöт.
«Сё унажык гöсь бöрйö Кудымкар, медбы тöдсасьны коми-пермяцкöй культуракöт. Национальнöй стильын номеррез отсалöны аркмöтны рочöн кö висьтавны – эффект полного погружения. Мийö старайтчамö кольны вежтöг самобытность да видзчисямö унажык путешественникöс, кöдна донтöны традицияэз. Одзлань – осьтны эшö кык номер народнöй декорöн», – висьтасисö «Пармаын».
«Югӧр» нима глэмпингын керкуэзлöн интерьер керöм сiдзжö коми-пермяцкöй культураись элементтэзöн. Декорын используйтчöны серрез да рöммез национальнöй стились. Этö керö быдöс гöгöр ассямаöн да отсалö гöссезлö матынжык тöдсасьны окрглöн культуракöт. Уськöтамö тöдвылö, мый 2025 воö Коми-Пермяцкöй округ порйöтö сё во аркмöмсянь. Перем крайись губернатор Дмитрий Махонин шуис этö восö коми-пермяцкöй кывлöн Воöн.
Русский