юӧррез

Кудымкарын челядьлöн хореографическöй коллективвез коласын чулалас «Туримоль» нима народнöй йöктаннэзлöн батл. Сцена вылын мыччасясö 10 восянь 17 воöдз челядь авторскöй номеррезöн народнöй танец жанрын. Вермисьлö козьналасö сьöм - 100 000 руб.

Туррез отсалöны пыдынжыка пырны коми-пермяккез историяö, кылö, кухняö да мифологияö. Öтiк лунся экскурсияэзкöт ордчöн аркмисö экспедицияэз 2-5 лун кежö округись ылын деревняэзö, кöднаын эшö кольччö быдпырся олан, например, Пожва, Гайны, Коса. Туристтэз тöдсасьöны местнöй достопримечательносттезкöт да участвуйтöны обряддэзын, мастер-классэзын да этнографическöй спектакллезын.

2025 вося июль 10 лунсянь июль 13 лунöдз Перемын чулалас медодзза акт «ЛЮБИТÖМ» нима öння народнöй искусство сьöртi Россия пасьта фестиваль - культурнöй инициатива, кöда чулалö Перем крайись культура сьöртi Министерство отсöтöн. Пыранiн унажык событие вылö лоас сьöмтöм.

Июль 21 лунö Коми-Пермяцкöй национальнöй драмтеатрлöн площадь одзын мыччасясö Прикамьеись 16 творческöй коллективись 160 артистся унажык. Видзöтiссез адззыласö уличнöй спектакллез, цирковöй номеррез, ходуляэз вылын шоу да биа представленнэз. Мероприятие лоас Коми-Пермяцкöй округлöн сёвося культурнöй программалöн торöн. Пыранiн сьöмтöм.

Кольöм шоччисян луннэзö Верх-Иньваын ю дорын (Кудымкарсянь 20 км ылына) чулалiс «Синва на Иньве» нима трибьют-концерт – йитöм ХХ векын тöдчана композиторкöт Александр Клещинкöт. Сылiсь музыкасö эзö орсö кытöнкö 30 во гöгöр.

Округлöн сё во кежö гожумся порйöтöм коста керасö обрядовöй вежалуннэз, кöдна йитöмöсь горткöт да горкöт. Öтiк лунö – июнь 14 лунö – чулалас «Гор Гӧгӧр» нима фестиваль Шадринаын да «Праздник русской печки» Чадзöвын. Ны коста гор, кыдз и 200 во сайын, бöра лоас коми-пермяккез оланын центрöн.

2025 вося гожум Коми-Пермяцкöй округын лоас ассяма культурнöй марафонöн. Куим тöлiсь сьöрна чулöтсясö 50 фестивалься да вежалунся унажык Перем крайись 30 карис да посёлокись, а сiдзжö Москваись да Санкт-Петербургись. 5 сюрся унажык артист, гижись, серпасалicь да творческöй коллектив участвуйтасö уна жанраа программаын, кöдаö пырасö этнокультурнöй наследие, öння искусство, гастрономия, музыка, театр, спорт да томпöлöслöн инициативаэз.

Коми-Пермяцкöй округись тöдса достопримечательность басöксьöтiсö ландшафтнöй дизайн отсöтöн. Арт-дизайнер Ирина Вилесова «Точка на карте. Точка интереса» нима программа сьöртi акрмöтiс гардчан быдмассэз понда шпалералiсь установка и кöдзис местнöй вöрись «многолетниккез». Авторлöн замысел сьöртi, кöр нiя быдмасö, арт-объект пöрас вöра пельöсокö шоччисьöм да фотографируйтчöм понда.

Коми-Пермяцкöй округлöн сё воö Юсьвинскöй округöт маршрут пырис Перем крайись медбур туристическöй проекттэз коласö. Аркмöтiсö сiйö Перемись государственнöй гуманитарно-педагогическöй университетiсь (ПГГПУ-ись) велöтчиссез да велöтiссез. Проект шусьö «От А до КАРа». Сiя лоис вермисьöн öтлаöн сизим мöдiккöт «Путешествие по Пермскому краю» нима региональнöй конкурсын.

Гастроллез мунöны Горький нима Коми-Пермяцкöй национальнöй драматическöй театрлöн сцена вылын. Ассиныс программа мыччалiсö ни Перем крайись тöдса театральнöй да творческöй коллективвез. Арся театральнöй сезонлöн медшöр событиеöн лоасö Перемись опера да балет театрись да куклаэзлöн Театрись артисттэзлöн выступленнёэз.