юӧррез

Кипода морттэзлöн уджжез коми-пермяцкöй мотиввезöн лыддисö медбуррезöн «Пермский сувенир» нима региональнöй конкурсын. Уджжез донтiсö öткоста квать номинацияын – аксессуаррезсянь гастрономическöй сувениррезöдз.

Отеллез пондiсö пыртын номернöй фондлöн оформленнёö коми-пермяцкöй стиль. «Парма», медтöдчана да медваж гостиница карын, медодззаöн вежис номеррезлiсь интерьеррез аутентичнöй стильö. Татöн сувтöтöны коми-пермяцкöй деревняэзiсь вайöм берся. Номеррезын сувтчывлiс ни РФ Народнöй артист Дмитрий Харатьян юбилейнöй мероприятиеэз коста, кöдна вöлiсö йитöмöсь Коми-Пермяцкöй округлöн сё вокöт.

Кольöм шоччисян луннэзö Коми-Пермяцкöй округлöн юркарын öткоста чулалiсö кык ыджыт событие, йитöмöсь национальнöй культуракöт — форум «Коми мир» да Никольскöй ярмарка. Нiя пырисö Коми-Пермяцкöй округлöн сё волöн да коми-пермяцкöй кывлöн Волöн порйöтöм мероприятиеэз коласö. Нiя лоисö ыджыт лыдаöcь да öктiсö 20 сюрс видзöтiсся унажык.

Коми-Пермяцкöй округлöн юркарын май 24 лунö медодззаись чулалас тулысся Никольскöй ярмарка. Майся ярмарка Тулысся Микола лунö бöра йитас религиознöй традицияэз гажа народнöй гуляннёэзкöт, а сiдзжö козьналас гöссезлö быдса лун öтöрын орсан понда да ыджыт концертнöй программа И.Я.Кривощеков нима ПКИО-ын.

Кудымкарын чулалас «Коми мир» нима форум - кыклунся мероприятие, кöда йитöм коми кыв да письменность Лунöн. Форум öтлаöтас учёнöйезöс, гижиссезöс, артисттэзöc, кипода морттэзöс, велöтчиссезöc да активисттэзöс Республика Комиись да Прикамьеись быд пельöсiсь. Медшöр событиеöн лоас челядь да томпöлöс коласын национальнöй кывлöн популяризация сьöртi практикаэзлiсь обсужденнё.

Коми-Пермяцкöй округлöн юркар судзöтiс Гран-при «Туристические города» нима II Всероссийскöй премиялiсь «Город этнокультурного туризма» нима номинацияын. «Кудымкар. От мифа к реальности» нима проект орддис Йошкар-Ола, Уфа да Саранск и вöлi шуöм медбурöн аслас категорияын.

Кад да уджлöн места: май 17 лунсянь - август 31 лунöдз, Кудымкар, Коми-Пермяцкий этнокультурный центр (ул. Студенческая, 9а) Серпасалiсь Дарья Обирина живописнöй уджжезлöн персональнöй выставка, Губахаись серпасалiсь, висьтасьö коми-пермяцкöй мифологическöй существоэзлiсь историяэз.

Коми-Пермяцкöй округись олiссез басöка порйöтiсö Ыджыт Победалiсь 80 во. Кудымкарын, а сiдзжö округись деревняэзын да селоэзын чулалiс «Бессмертный полк» нима мунöм, вежалунся концерттэз, памятнöй рыттэз да патриотическöй акцияэз. Нiя луннэзö кылiсö военнöй сьыланкыввез да кывбуррез, мыччасисö фольклорнöй коллективвез. Вежалунлöн медшöр идеяöн вöлi поколеннёэзлöн йитöт да вермиссезлöн подвиггез тöдвылын видзöм.

Май 9 лунö Коми-Пермяцкöй округлöн юркарын торжественнöй мероприятиеэз, йитöмöсь Вермöмлöн 80-вося лункöт, пондасö чулалавны быдса лун коста. Карлöн площадь вылын медшöр рытся событиеын - «НАРОДЫ ПЕРМСКОГО КРАЯ — ПОБЕДЕ!» нима театрализованнöй представленнёын – орсас 500-ся унажык артист.

Медодззаись медбöрья 27 воö Перемись культуралöн институт öктö коми-пермяцкöй актерскöй студия. Аркмöм курс лоас öкмысöт театрлöн быдöс историяын. Кывзöм дынö корöны нывкаэзöс да зонкаэзöс 17-сянь 23-öдз коми-пермяцкöй кыв тöдöмöн. Быдöс абитуриенттэскöт, кöдна бура сетасö вступительнöй испытаннёэз, лоас гижöм договор, кöда обязательно сетö удж понда места Коми-Пермяцкöй национальнöй театрын.