Округлöн сё во кежö гожумся порйöтöм коста керасö обрядовöй вежалуннэз, кöдна йитöмöсь горткöт да горкöт. Öтiк лунö – июнь 14 лунö – чулалас «Гор Гӧгӧр» нима фестиваль Шадринаын да «Праздник русской печки» Чадзöвын. Ны коста гор, кыдз и 200 во сайын, бöра лоас коми-пермяккез оланын центрöн.
Шадринаын (220 км Перемсянь, Кудымкарскöй округ) чулалас «Гор Гӧгӧр» нима вежалун. Сiйö осьтасö гöссез панталöм обрядöн да «Пелысёк» нима народнöй ансамбльлöн выступленнёöн. Вит олан керкуын оссясö мастерскöйез, кытöн мыччаласö, кыдз керöны традиционнöй коми-пермяцкöй берся, лöсьöтасö национальнöй кухняись сёяннэз, чулöтасö баннöй ритуаллэз да ароматерапия. Гöссезöс нуöтасö деревняöт, висьтасясö XVIII–XIX векся керкуэз йылiсь да мыччаласö «Пыш ты» нима тöдчана чочком-лöз родник.
Чадзöвын (300 км Перемсянь, Косинскöй округ) чулалас «Праздник русской печки». Татöн вились мыччаласö «Кага миссьöтан» нима ассяма обряд – кагаöс горын миссьöтöм, кыдз этö керисö коми-пермяцкöй семьяэзын, кöр гор вöлi и комöн, и баняöн. Гöссезöс велöтасö керны ырöш пиканöн, ас киöн соровтны ви да кыйны ньывись короссез. Видзöтiссезлö висьтасясö стариннöй технология сьöртi глинобитнöй гор тэчöм йылiсь. Лоасö этноэкскурсияэз, важ дозмуклöн выставка, коми-пермяцкöй сёяннэзлöн да туруна чайезлöн пешлöм. Фестиваль чулöтсьö «59 фестивалей 59 региона» нима проект сьöртi.
Кыкнан вежалун – ассяма коми-пермяцкöй традицияэзкöт матöжык тöдсасьöм понда вермöм. Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Русский