Коми-Пермяцкöй округись тöдса достопримечательность басöксьöтiсö ландшафтнöй дизайн отсöтöн. Арт-дизайнер Ирина Вилесова «Точка на карте. Точка интереса» нима программа сьöртi акрмöтiс гардчан быдмассэз понда шпалералiсь установка и кöдзис местнöй вöрись «многолетниккез». Авторлöн замысел сьöртi, кöр нiя быдмасö, арт-объект пöрас вöра пельöсокö шоччисьöм да фотографируйтчöм понда.
Пуись керöм вöрись да Ö шыпас – Кудымкарын популярнöй арт-объекттэз, кöдна гленитчöны олiссезлö да Кудымкарись гöссезлö. Сувтöтöм шпалера пöлöн кöдзисö таг. Сiя чожа быдмас да вермас керны топыт ловья йöр. Композициясö содтiсö Пармалöн быдмассэзöн – кöртдой турунöн, вежсинöн, сьöктан турунöн, тагöн, ругозаöн, эхинацеяöн, горадзульöн да мöдiк быдмассэзöн.
«Вöлi кöсйöм мыччавны округлicь культурнöй код. Сiйöн мийö керимö виж, уютнöй да фотогеничнöй пространство, сэтшöм, кöдаl локтан бы бöра. Надейтчамö, мый арт-объект босьтас ас вылас унажык дзарньöв да лоас олiссез да Кудымкарись гöссез понда притяженнёлöн точкаöн», - висьтасис Ирина Вилесова.
Реновация аркмöтöм «Точка на карте. Точка интереса» нима программа сьöртi. Öтiк тематическöй блок ны коласiсь йитöм округлöн общественнöй пространстволöн благоустройствокöт да шусьö «многоТОЧИЕ».
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Информационнöй справка:
«Точка на карте. Точка интереса» нима проект вермис «Пермский край — территория культуры» нима культура сьöртi министерстволöн конкурсын и вайис Кудымкарскöй округлö регионлöн тавося культурнöй столицалicь статус. Проектлöн программаын - спектакль-мюзикл коми-пермяцкöй кыв вылын, арт-резиденция, памятнöй рыттэзлöн галерея, выставкаэз, лекцияэз, кулинарнöй вермасьöммез да уна мöдiк. Программа кыссяс быдöс 2025 во да йитас творческöй отирсö – серпасалiссезöс, скульпторрезöс, дизайнеррезöс, поэттэзöс да музыканттэзöс.
Русский