Медсимволичнöй торöн чулалöм Чердынь дынын «Зов Пармы» нима этно-ландшафтнöй фестивальлöн лоис традиционнöй коми-пермяцкöй гöтрасьöмлöн реконструкция. Коми-Пермяцкöй округлöн сё во кежö да коми-пермяцкöй кывлöн Во кежö обрядыс лоис не только фестивальнöй программалöн торöн, но и народнöй культуралöн ловья да вына памятьöн. Важ коми-пермяцкöй свадебнöй обрядын участвуйтic гозъя Березникиись Евгений да Алёна Ганзерт.
Свадебнöй церемониясö чулöтiсö Кочёвскöй округись «Кукушка» да «Мича Асыв» нима фольклорнöй коллективввез. Обрядыс эз вöв постановкаöн, а лоис торöн былься гöтрасьöмлöн: геройезöн лоис Березникиись том гозъя — Евгений да Алёна Ганзерттэз, кöдна решитiсö öтлаöтны ассиныс оланнэзнысö именно сэтшö обрядовöй форматын. «Парма вылын гöтрасьöм — медшöр событий миян оланын! Мийö öддьöн радöсь, мый вермимö адззыны йитöт «Зов Пармы»-лöн аркмöтiссезкöт да гажöтчыны паськöммезсянь да обряддэззсянь, вöв вылын ысласьöмсянь, бур отиркöт тöдсасьöмсянь, кöднатöг эз бы аркмы быдöс эта», — гижис Евгений Ганзерт.
Церемонияö пырис сизим обрядовöй тор, сiдзжö выкуп воротаэз одзын быдкодь испытаннёэзöн вын вылö да смекалка вылö, ичмоньлöн вызов йöктаннэзöн-баитаннэзöн, чикись кыйöм да свадебнöй пир народнöй сьыланкыввезöн да предсказаннёэзöн. Кульминацияöн лоис томмезöc аймамöн благословеннё да басöксьöтöм вöлöн мунöм — виль оланлöн пондöтчöмлöн пас. Обрядыс быдсöн чулалiс былься национальнöй паськöммезын, сьыланкыввезöн да коми-пермяцкöй серниöн.
«Этö вöлi быдöс сiдз, кыдз ме кöсйи — важ церемония коми-пермяцкöй традицияэз сьöртi, басöк паськöммез, «Кукушка» да «Мича Асыв» ансамбллезлöн душевнöй сьыланкыввез. Эта лунлöн быд момент вöлi тыртöм ассяма вежöртасöн», — гижис Алёна Ганзерт.
«Зов Пармы»-лöн аркмöтiссез висьталöны, мый обрядлöн сэтшöм формат — не просто реконструкция, а «возвращение к подлинному». Фестиваль вились пасйис: народлöн культура мунö одзлань сэтчин, кытöн олöны искренне да öтлаын.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Тавося во шуöм коми-пермяцкöй кыв Воöн, и вежалунся мероприятиеэс лоисö ыджыт культурнöй программалöн торöн. Юбилейнöй событиеэзлöн программнöй дирекция - Пермский дом народного творчества «Губерния».
Фото: Алексей Уткин.
Русский