олан

Коми-пермяккез – Прикамьелöн йöз коласын медваж йöз

150-130 сюрс во сайын медодззаись морт шедiс Чусовöй да Кама юэз дорö. Кытöнкö миян эраöдз 9 сюрс во гöгöр пондiсö аркмыны Евразиялöн финно-угорскöй йöззэз. Нiя аркмöтiсö оланiннэз, нуöтiсö хозяйство – Кама да Волга гöгöр чужис öтласа финноязычнöй котыр – ананьинскöй, кöда сэсся миян эраöдз мöдöдз тысячелетиеын вуджö пьяноборскöй да гляденовскöй археологическöй культураэзö. Натьтö, нылöн племёэз и лоисö Приуральеись да Поволжьеись öнняся финноязычнöй йöзлöн предоккезöн. Сыбöрын эта котыр разсис учöтжык торрез вылö, ны коласын вöлiсö и коми-пермяккезлöн предоккез: ломоватовскöй, неволинскöй и родановскöй археологическöй культураэзлöн племёэз.

Ломоватовскöй и родановскöй культуралöн памятниккез (V-XV вв.), кöднö, натьтö, колисö кöркöся коми-пермяккез, адззöмöсь ойвыв ладорын Камско-Печорско-Вычегодскöй пограничьесянь лунвыв ладорын Чусовöй юöдз, Камалöн пондöтчöмсянь Ураллöн предгорьеöдз. Территорияыс лöсялö öнняся Перемскöй крайлöн да Кировскöй обласьтлöн восточнöй торлöн территориякöт.

Медшöр уджöн отирлöн сэк вöлi вöралöм, чериалöм, быдкодь ремеслоэз, а сыбöрын му вылын да солöн удж. Коми-пермяккез велалicö уджавны кöртöн, пондiсö кужны керны вöрпи вылö да быдкодь ассяма морттэз/чуддэз вылö вачкисяна украшеннёэз оловоись да медись, нiя лоисö тöдсаöсь быдöс Россия пасьта «пермский звериный стиль» ним увтын.

1920-öт воöдз шусисö пермяккезöн (пермиччезöн, пермянаöн), а сэсся аркмис этноним «коми-пермяки». Кыв «коми», лингвисттэз сьöртi, медодзза ним йöзлöн и вежöртсьö кыдз «ас родвужлöн, ас племёлöн морт».

Коми-пермяккез торйöтчöны нёль этнографическöй группа вылö:

— иньвенскöй (южнöй/лунвывся, Иньва юсянь, медыджыт группа, коми-пермяккезлöн медшöр тор);
— косинско-камскöй (севернöй/ойвывся, Коса да Кама юэзсянь);
— верхнекамскöй (зюздинскöй, Сюзьва юсянь);
— язьвинскöй (Язьва юсянь)

Ойвывся да лунвывся комиэз торйöтчöны не только кыв сьöртi, но и хозяйственнöй да культурно-бытовöй ассямаэз сьöртi.

_____

Пермскöй зверинöй стильлöн бронзовöй художественнöй пластикалöн артефакттэз

Коми-пермяккезлöн этническöй öтлаöтсьöмлöн кад. Перем Великаялöн (коми-перм. Ыджыт Перем öксуму) Кама, Вишера, Колва да Язьва вылын зорамöм.

Эта кадö Перемскöй муэз вöлiсö Новгородскöй республика пытшкын и 1471 воöдз öтлаын Югракöт шусьöны кыдз новгородскöй «волосттез». Тöдса, мый перемскöй муэз, кыдз и югорскöйес, XII векын ни вештiсö Новгородлö дань.

Верхньöй Прикамьеись коми-пермяккез пыр вузасисö Поволжьекöт и прикаспийскöй регионiсь странаэзкöт, кытчö Камаöт да Волгаöт мунiс веськыт туй.

Отир веритiс язычествоö. Тöдса уналö Чердыньын да Искорын святилищеэзöн.

_____

Уна во коста вежсьытöм Полюд мыс. Ю. Черновлöн серпас

XV век шöрын Москваись княззез пондiсö сувтöтны Перем Великаяö ассиныс юралiссезöс, а 1472 воö муэс пырисö Роч государствоö. XVIII век помöдз мунiс коми-пермяккезлöн öтлаöтсьöм.

Сэк жö чулöтчис отирлöн пыртöм. Но комиэз дыр кежö эшö кольччисö язычниккезöн. Эта йылiсь висьталö пермская деревянная скульптура или «пермские боги» - Енлöн да вежаэзлöн (святöйезлöн) объёмнöй изображеннёэз.

Унавося олан роччезкöт ордчöн сiдзжö пуктiс пай коми-пермяккез культураö и бытö: аркмисö öткодь семейнöй обычайез, календарнöй обряддэз да вежалуннэз. Но язычество, ассяма торрез кöдалöн öнöдз эшö пантасьöны, да религия аркмöтiсö мöдкодь, невачкисяна дзарньöв олан вылö да сы вылö, мый гöгöртö йöзсö.

Коми-пермяккез гортöн кöркö (XVII век помöдз) вöлiсö уна районнэз Перем крайись (Чердынскöй, Соликамскöй, Усольскöй, Карагайскöй, Ильинскöй), öнi жö сэтчин етша ни позьö пантавны кинöскö комиэзiсь.

_____

Перемскöй пуись керöм скульптураэз Пермскöй государственнöй художественнöй галереялöн залын. [1980-е гг.] Фотограф: Е. Н. Загуляев
ГАПК. Ф. ф. Оп.50п. Д.222. Л.5.

1558 воö муэз Камаöт Соликамсксянь Чусовöйöдз сетiсö Строгановвезлö. Сэксянь лунвывся коми-пермяккезлöн муэз вылын (Соликамскöй уезд) аркмö крепостничество. Ойвывся коми-пермяккез (Чердынскöй уезд) кольччöны государственнöй крестьянаöн. Нiя вештiсö налоггез казнаö да нуöтiсö государственнöй удж – строитiсö Московско-Сибирскöй тракт, кöда мунiс Перем Великая муэзöт.

XVIII век пондöтчöмын коми-пермяккез олiсö унажык Чердынскöй уездлöн 4 погостын (Гайнскöй, Косинскöй, Юксеевскöй да Верх-Язьвинскöй) да Соликамскöй уездлöн 9 погостын (Кудымкарскöй, Майкорскöй, Кылосовскöй, Ёгвинскöй, Георгиевскöй, Богородскöй, Николаевскöй, Юсьвинскöй, Купросскöй). Сэк эшö аркмöм территория кольччис öння кадöдз (неыджыт вежсьöммезöн). Сiя жö кадö лöсялiсö муэз и коми-пермяккезлöн медшöр этнографическöй группаэзлöн.

1795 вося ревизия сьöртi Верхньöй Кама вылын (1797 восянь Перемскöй губерния) олiс 29800 мымда коми-пермяк. 1897 воö Медодзза Россия пасьта перепись висьталö 92461 коми-пермяк йылiсь Перемскöй губернияын.

Бура отсалiсö зорамны коми-пермяккез хозяйстволö да культуралö осьтöм XVIII-XIX веккезö Пожваын (1754), Майкорын (1812) да Куваын (1856) заводдэз. Пожвинскöй завод коста 1799 воö аркмис öння Коми-Пермяцкöй округлöн территория вылын медодзза школа. Грамотность содтöмлö уна отсалiсö земствоэз: XIX веклöн медбöрья воэзö нiя осьтiсö дасся унажык школа.

Уна морт Иньвенскöй крайын вузасисö няньöн. Медшöр – Кудымкарын да Юсьваын. Быдмис дон верхнекамскöй, косинскöй да иньвенскöй вöррезлöн Уралын горнöй да горнозаводскöй промышленностьлöн зорамöм коста. Медшöр удж, кöдöн позис судзöтны сьöм крепостнöй право мунöм бöрын, вöлi руда да пес заводдэз вылö новйöтöм да совлöн промыселлэз. Судостроеннё зорамöм увья Косаöт XIX век шöрын быд во кылöтiсö уна вöр, сiдз кыдз Прикамьелöн совлöн промышленнность вöлi древесиналöн медыджыт потребительöн.

Медшöр кустарнöй промыселлэзöн вöлiсö кузнечнöй, скорняжнöй и красильнöй удж.

Сы коста округлöн территория вöлi сэтшöм административно-территориальнöй образованнёэзын:

— XV веклöн мöдiк тор - 1708 г. - Перем Великая (Чердынскöй княжество) составын;
— 1708 - 1727 воэзö - Сибирскöй губерния составын;
— 1727 - 1781 воэзö - Казанскöй губерния составын;
— 1781 - 1923 воэзö - Перемскöй губерния составын.

_____

Усть-Боровскöй сользаводiсь сов новйöтiссез амбар дынын (ХХ в. пондöтчöм, СКМ фонддэзiсь)

1919 воö, Гражданскöй война коста, Пётр Иванович Субботин-Пермяк вöлi Наркомпрослiсь изобразительнöй искусствоэзлöн Коллегияын уполномоченнöй статусын и кужис аркмöтны Перемын и Кудымкарын (сэк Кудымкор село) художественнöй мастерскöйез. Нiя лоисö регионлöн культурнöй центрöн, кытöн велöтiсö живописьö, графикаö, керамикаö, пукöт уджö и мöдiк ремеслоэзö, а сiдзжö чулöтiсö выставкаэз, лекцияэз да спектакллез. Субботин-Пермяк да сы инь Евстолия Ивановна отсöтöн мастерскöйез пондöтiсö округлiсь искусство, образование да культура зорöтöм, именно нысянь недыр мыйись аркмисö музеез, школаэз, училищеэз да театр.

1921 вося июль 30 лунö Кудымкарын вöлi осьтöм П. И. Субботин-Пермяк нима краевöй национальнöй музей.

______

Евстолия Ивановна и Пётр Иванович Субботины. Село Кудымкар. 1919. Источник

1925 вося февраль 26 лунö Всероссийскöй центральнöй исполнительнöй комитетлöн (ВЦИК) постановленнёсянь Уральскöй областьын вöлi аркмöтöм Коми-Пермяцкöй национальнöй округ. Эта вöлi СССР-ын медодзза национальнöй округ, кöда сьöртi сэсся аркмисö и мöдiк национальнöй округгез том Советскöй странаын. Экономическöй причинаэз увья Москваын ВЦИК-ись Президиумлöн Комиссия лыддис, мый буржык аркмöтны округ Уральскöй областьын (кöркöся Перемскöй, Екатеринбургскöй, Челябинскöй да Тюменскöй губернияэз). Жагöна округö пырисö аркмöтöм 1926 вося сентябрь 15 лунö Кочевскöй да Гайнскöй районнэз, а 1941 вося январь 13 лунö – Белоевскöй район.

Национальнöй округлöн аркмöтöм коста вöлi пыртöм кыв «Пермяцкöй», мый висьталö йöз йылiсь, кöда олö сэтöн. Сыбöрын Уральскöй облисполком решитiс шуны округ «Коми-Пермяцкöйöн».

Коми-Пермяцкöй округ аркмöтöм отсалiс коми-пермяккез культура зорамöмлö. Чулöтсис радио- и электрофикация. 1927 воö пондiс уджавны округын медодзза ГЭС, лоö сельскохозяйственнöй техника, медодззаись мыччассьö кино, оссьöны культуралöн да образованнёлöн учрежденнёэз, округö пондiсö локны квалифициованнöй специалисттэз, аркмö национальнöй, политическöй, трудовöй и культурнöй элита.

____

Коми-Пермяцкöй окрисполком аппаратiсь членнэзлöн коллективнöй фотография. Одзись планын шöрын - Ф. А. Сыстеров, окрисполкомлöн председатель, 1929 во КПОГА, СИФ.

1925 вося февральсянь 1934 вося январьöдз Коми-Пермяцкöй национальнöй округ пырис Уральскöй область составö.

1934 вося январьсянь 1938 вося октябöдз округ вöлi Свердловскöй область составын. 1938 вося июль 10 лунö петiс ВЦИК-ись Президиумлöн постановленнё посёлок Кудымкар карö вежöм йылiсь. Эта лунсянь Кудымкар лоис Коми-Пермяцкöй округлöн юркарöн.

1938 вося октяб 3 лунö вöлi аркмöтöм Перемскöй область. Петiс СССР-ись Верховнöй Советiсь Президиумлöн Указ «О разделении Свердловской области РСФСР на Пермскую и Свердловскую области» и 1938 восянь Коми-Пермяцкöй округ пырис Перемскöй область составö.

Эта кадö округын аркмис уна вильыс: оссис окружнöй издательство (1930); национальнöй драмтеатр, кöда шусьö öнi А.М. Горький нима Коми-Пермяцкöй национальнöй драматическöй театр (1931) да национальнöй ансамбль песни и пляски (1939); виль техникуммез, стадион, кинотеатр; быдмис колхоззэзлöн да учöт предприятиеэзлöн лыд; аркмис ыджыт да вына вöра промышленностьлöн трест «Комипермлес» (1936); зорамис транспортнöй вез (сеть); помассис Кудымкар-Менделеево туйлöн строитöм; округын аркмис кар (1938); чужис коми-пермяцкöй алфавит (1938).

_____

Стадион «Динамо» осьтöм. Сулалöны коми-пермяцкöй леснöй техникумлöн да медшколалöн спортивнöй командаэз. Кудымкар, 1932 во.
КПОГА, СИФ. Снимоклöн компьютернöй обработка - В.П. Гребнев.

Коми-Пермяцкöй округись олiссез öтлаын Советскöй Союзiсь мöдiк йöзкöт активнöя участвуйтiсö 1941-1945 воэзся Великöй Отечественнöй войнаын. Округ отсалiс вермасиссезлö cёянöн, паськöмöн, öктöм сьöмöн. Предприятиеэз вылын Гöрд Армия понда керисö валенкиэз, доддез, лыжаэз, ручнöй гранатаэз понда корпуссэз. Округ пасьта вöлi аркмöтöм нёль госпиталь; районнэзöт адззисö виль горт западнöй регионнэзiсь эвакуируйтöм отир.

Великöй Отечественнöй война вылö Коми-пермяцкöй округись мунiс 31, сюрс мымда морт, кöднаись 18,5 сюрс кулiсö. 6 тысячася унажык коми-пермяклö козьналiсö боевöй подвиггез понда ореннэзöн да медаллезöн, а 13 морт лоисö Советскöй Союзлöн Геройезöн.

1944-öт воö чулалiс СССР-лöн АН-ись географиялöн Институтлöн экспедиция коста округлöн уна ладорсянь велöтiöм. 1949-öт воö оссис челядь понда библиотека, зорамисö сельскöй клуббез да изба-читальняэз, чулöтсисö окружнöй литературнöй конференцияэз, аркмисö виль периодическöй изданнёэз.

_____

Кудымкарскöй районлöн Пешнигортскöй сельсоветiсь Гöрд обоз няньöн «Смерть фашистским оккупантам». Колхозниккез сетöны нянь фронт понда. Кудымкар кар. 1943 во.
КПОГА, Ф.Р-265, Оп.1, Д.772, Л.1.

1950-öт воэзö Перемын чулалiсö коми-пермяцкöй литература да искусство сьöртi кык декада (1950 и 1959 воэзö); Пермскöй пединститутын А.С. Кривощекова-Гантман отсöтöн осьтöм коми-пермяцкöй отделеннё (1954); петiс медодзза литературно-художественнöй сборник «Иньва» (1955); пондöтчис удж коми-пермяцкöй кыв велöтöм сьöртi.

1959-öт воö дугдiс вöвны Белоевскöй район, йитöм неыджыт тор кöркöся Перемскöй областись Чермозскöй районлöн Майкор да Пожва поселоккезкöт.

_____

Кудымкарскöй ГАТП-ись уджалiссезлöн группа. 1951 во.
КПОГА, Ф.Р-265, Оп.1, Д.1542, Л.1.

1960-öт воö Майкор дынын вöлi адззöм нефть; паськалiс жилищнöй, культурно-бытовöй, колхознöй, коммуникационнöй строительство: сувтöтiсö уна школа, челядь саддэз, магазиннэз, столовöйез, пекарняэз, клуббез.

1961 воö аркмис радиовещаннёлöн окружнöй редакция.

1964 воö петiс «Наш край» нима медодзза краеведческöй сборник.

1965 воö сувтöтöм автовокзал, а 1968 - «Комсомолец» нима кинотеатр. Пондiсö уджавны электропередачалöн линия Пермь-Кудымкар, водопровод да канализационнöй сооруженнёэз Кудымкарын.

Научно-культурнöй оланын лоисö унажык уджжез коми-пермяккез кыв да история велöтöм сьöртi: округö пондiсö локны ыджыт лингвистическöй, археологическöй да этнографическöй экспедицияэз; коми-пермяцкöй специалисттэз пондiсö ветлöтны Всесоюзнöй конференцияэз да семинаррез вылö; селоэзын да деревняэзын оссьöны краеведческöй музейез.

_____

Сцена «Пера-богатырь» нима хоровöй сюитаись А. И. Клещин музыка вылö. Свердловскын выступленнё. 1967 во.
КПОГА, Ф.Р-163, Оп.1, Д.90, Л.1.

1972-öдз вося декаб 29 лунö ыджыт заслугаэз советскöй йöзлöн ёртасьöм вылын удж сьöртi, хозяйствоын да культураын удж сьöртi СССР-лöн 50 вося юбилей увья Коми-Пермяцкöй национальнöй округ вöлi донтöм Дружбы народов орденöн.

1975-öт вося февраль 28-öт лунö Коми-Пермяцкöй округ донтöм Трудового Красного Знамени орденöн, сiя жö воö чулалiс округлöн 50-вося юбилейлöн порйöтöм.

1977-öт воö Коми-Пермяцкöй национальнöй округын чулалiс | Всесоюзнöй сельскöй зимнöй спортивнöй орсаннэзлöн финальнöй этап.

1977 воö СССР-лöн виль Конституция пыртöм коста Коми-Пермяцкöй округ лоис официально Автономнöйöн Перемскöй областьын.

_____

Коми-Пермяцкöй национальнöй округлö Дружбы народов орден сетöм. Орден да грамота коми-пермяккезлö козьналö КПСС-лöн Перемскöй обкомись медодзза секретарь Б. В. Коноплев. Кудымкар кар. 09.02.1974 во.
КПОГА, Ф.Р-265, Оп.1, Д.19, Л.1.

1981 воö Кудымкарын оссис П. И. Субботин-Пермяк серпасалiсь нима керку-музей, а М. Горький нима Коми-Пермяцкöй окружнöй драматическöй театр донтiсö «Знак Почета» орденöн советскöй тетаральнöй искусство зорöтöм понда.

1985-öт воö чулалiс округлöн 60-вося юбилейлöн порйöтöм, а 1988 – Кудымкарлöн 50-öт во.

1986-öт воö Кудымкарын мунiс мöдöдз окружнöй научно-практическöй конференция коми-пермяцкöй кыв да литература сьöртi, сiдзжö вöлi осьтöм Славалöн Аллея, кытчö пыртiсö тöдчана коми-пермяккезлiсь ниммез.

1988-öт воö вöлi аркмöтöм СССР-ись АН-лöн Уральскöй отделеннёын Коми научнöй центрлöн общественнöй наукаэзлöн, кывлöн, литературалöн да историялöн Коми-Пермяцкöй отдел, а декабын чужис «Югор» нима общество.

Одзлань сувтöтiсö виль предприятиеэз, керкуэз, пуктiсö туйез да коммуникацияэз.

_____

Кудымкарлöн 50-вося вежалунлöн пондöтчöм карлöн стадион вылын. Шöрас - Екатерина Плотникова, Московскöй филармониялöн артистка. 1988 во.
КПОГА, Ф.Р-265, Оп.1, Д.1371, Л.1.

1992-öдз воö Коми-Пермяцкöй АО лоис федерациялöн самостоятельнöй субъектöн, но формальнöя кольччис йитöм Перемскöй областькöт.

Ны коласын вöлiс Договор о разграничении предметов ведения и полномочий между органами государственной власти Российской Федерации, Пермской области и Коми-Пермяцкого автономного округа от 31 мая 1996 года.

_____

Кудымкарись куимöт Гимназиялöн зданнё да неыджыт территория. 1998 во.
КПОГА, СИФ, 1477/К, Л.13

2005-öт вося декаб 1 лунö Коми-Пермяцкöй автономнöй округ да Перемскöй область йитсисö да аркмöтiсö Перемскöй край, кöдаын Коми-Пермяцкиöй округ лоис ассяма статуса административно-территориальнöй единицаöн.

Округын экономическöй ситуация увья эта вöлi колана процесс. Йитöм одзын 2003 вося декаб 7 лунö чулалiс референдум, кöда вылын кыкнан регионiсь унажыкыс голосуйтiс öтласа субъект понда.

Эта одзын 2003 вося октябö Коми-Пермяцкöй округö вовлiс Россиялöн Президент - В.В. Путин.

Коми-Пермяцкöй округ пуктö пай Перемскöй крайлöн быд олан торö, содтö ассямасö аслас культураöн.

Öнi Коми-Пермяцкöй округ куйлö Перемскöй крайлöн северо-западын, сылöн ыждаыс – 32,7 сюрс км² мымда (20% быдöс регионлöн территориясянь), отирлöн лыд - 101,6 сюрс морт 01.01.2024 кежö, мый лоö 4% Перемскöй крайись быдöс населеннёсянь.

Коми-пермяккезлöн лыд 2020-2021 воэзся медбöрья перепись сьöртi 50163 морт (50% округлöн населеннёсянь). Коми-пермяккез – лыд сьöртi куимöт йöз Перемскöй крайын. Сы коста коми-пермяцкöй кыв кыдз чужан кыв Прикамьеын перепись сьöртi лыддьö 38,2 сюрс мымда морт. Кыв сiдзжö лоö куимöтöн лыд сьöртi Перемскöй крайын. Ордчöн коми-пермяккезкöт округын олöны роччез, кöдна аркмöтiсö ассиныс ареаллэз (Юрлинскöй муниципальный округ).

_____

Дунина Е. М. чулöтö экскурсия Россияись Президентлö В. В. Путинлö Коми-Пермяцкöй окружнöй краеведческöй музейлöн вöрва жырын. 2003 во.
КПОГА, Ф.Р-265, Оп.1, Д.1712, Л.1