Юрлинскöй да Кочевскöй школаэз лоисö вермиссезöн «Дети решают!» нима краевöй конкурсын, лöсьöтöм Перемскöй крайлöн образованнё да наука сьöртi Министерствоöн, и шедтiсö гранттэз Культурнöй проекттэз реализация вылö. Кочёваись велöтчиссез аркмöтасö «Наследие» нима этнокультурнöй мастерскöй народнöй ремеслоэз сьöртi мастер-классэзöн да коми-пермяцкöй кыв сьöртi занятиеэзöн, а Юрлинскöй школаын вежöны музей, керöны сыись цифровöй пространство.
Кочеваись этнокультурнöй мастерскöйлöн проект лоис медбурöн «Инициативы творческой молодёжи» нима номинацияын. Велöтчиссез мöдöны чулöтны экскурсияэз, кывлöн носителлезкöт пантасьöммез да кужись морттэз дынын велöтчöм. Сiдзжö лöсьöтöны Коми-Пермяцкöй округ сьöртi этнопутешествиеэз да гижиссезкöт, краеведдэзкöт да историккезкöт пантасьöммез «Живая история – диалог с успехом» нима программа сьöртi.
«Таво Коми-Пермяцкöй округлö тырис 100 во. Этö вермöм тöдсöтны велöтчиссесö асланым народлöн культурнöй наследиекöт. Проект увья нiя тöдасö унажык традицияэз, вились видзöтасö чужан му вылö и вежöртасö, мыля колö берегитны ассиным история да кыв», - пасйис Кочевскöй школаись воспитательнöй удж сьöртi замдиректора Светлана Вавилина.
Леонид Барышев нима Юрлинскöй школа вермис «Школьный музей. Перезагрузка» нима проектöн. Инициатива пырис медбуррез коласö «Патриотическое воспитание» нима номинацияын. 10 классiсь велöтчиссез öтлаын юралiськöт Светлана Ивановакöт мöдöны керны музейись, кöда йитöм школалöн историякöт, интерактивнöй образовательнöй среда. Музейын лоас сенсорнöй пызан, телевизор да радиогиддэз, кытшöмкö тор фонндэзлiсь цифруйтасö да торйöтасö тематическöй разделлэз вылö. Этö отсалас чулöтны экскурсияэз да занятиеэз быд кабинетын, а исследовательскöй удж дынö вермас подключитчыны унажык велöтчись.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Информационнöй справка
«Дети решают!» нима конкурс чулöтсьö Перемскöй крайын 2023 восянь и йитöм велöтчиссезлöн инициативаэзлö отсöткöт. Уджжез принимайтöны вит номинацияын: патриотическое воспитание; здоровый образ жизни, спорт и туризм; инициативы творческой молодежи; ученические инициативы; молодежные медиа. Таво конкурс вылö локтiс 106 заявка 39 муниципальнöй образованнёись, вермисьöн лоис 15 команда. Быд проект-вермисьлö сетiсö грант 300 сюрс рубöн.
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Русский