Медшöр культурнöй событие тавося арöн Перемын — «Флаэртиана» (18+) нима документальнöй кинолöн международнöй фестиваль — порйöтас Коми-Пермяцкöй округлiсь 100 во специальнöй кинопрограммаöн. Сентябрь 19 лунсянь сентябрь 25 лунöдз ыджыт экран вылын — отир да судьба йылiсь, традиция да тöдвыв йылiсь историяэз, кöдна ловзьöны вит ассяма фильмын. Коми-Пермяцкöй округись Верх-Иньваын пондöтö ассис удж «Питю Öньӧ» (0+) нима литературнöй дайвинг. Программаын — творческöй пантасьöммез коми-пермяцкöй да роч гижиссезкöт, челядь понда спектакль, мастер-классэз да выставкаэз.
«Флаэртиана» (18+)
Луннэз: сентябрь 19-25 луннэзö.
Места: Пермь, Комсомольскöй проспект, 53 (Пермская синематека / Кинотеатр «Кристалл»).
«Флаэртиана» нима документальнöй кинолöн международнöй фестиваль вылын мыччаласö специальнöй программа Коми-Пермяцкöй округлöн сё во кежö. Сыö пырис вит фильм отир, кыв, традицияэз да округлöн культура йылiсь.
- сентябрь 19 лунö видзöтiссез адззыласö Анатолий Балуевлiсь «Мы были дымом» (1992, 16+) нима фильм — философскöй размышленнё йöзлöн судьба йылiсь торья морттэзлöн историяэз пырйöт, гижöм Кочёвоын, режиссёрлöн чужан му вылын.
- сентябрь 24 лунö мыччаласö Алексей Романовлiсь «Третий звонок» (2024, 16+) нима картина — коми-пермяккезлöн кыв йылiсь да сылöн медшöр хранитель йылiсь, коми-пермяцкöй национальнöй драматическöй театр йылiсь.
- сентябрь 20 лунö, 17:30 часö — «Быкобой» (Анатолий Балуев, 2000, 18+). История Нижньöй Тагилiсь олiсьлöн Андрей Гагаринлöн, кöда локтö чужа селоö Ыджыт Кочаö, медбы пантасьны роднякöт да участвуйтны важ обрядын.
- сентябрь 21 лунö, 15:30 часö — «Старухи» (Галина Красноборова, 2015, 6+). Нель инька Косинскöй районiсь деревняэзiсь торйöтчöны воспоминаннёэзöн челядь, шогöттэз, жöниккез да радейтана сьыланкыввез йылiсь.
- сентябрь 21 лунö, 15:30 часö — «9 забытых песен» (Галина Красноборова, 2008, 12+). Черно-белöй кинопритча о мыжа йылiсь да коми-пермяцкöй традиционнöй культураын каддэзлöн йитöт йылiсь.
Билеттэз доступнöйöсь куим фильм вылö: «Быкобой», «Старухи» да «9 забытых песен». Нiйö позьö получитны кассаын öтiк час сеансöдз Пермскöй синематекаын.
«Питю Öньӧ» нима литературнöй дайвинг (0+)
Лун да кад: сентябрь 18 лунö10:00 чассянь.
Места: Кудымкарскöй округись Верх-Иньваись дом культуры (215 км Перемсянь).
«Питю Öньӧ» нима литературнöй дайвинг — быдвося событие, йитöм Андрей Зубовлöн, ХХ векся коми-пермяцкöй литературалöн основоположниклöн, творческöй наследиекöт. Сылöн псевдоним «Питю Öньӧ» и сетiс ним мероприятиелö.
Событие йитас гижиссезöс, велöтiссезöс да лыддьöтiссезöс, медбы тöдсасьны öння авторрезкöт да коми-пермяккезлöн культурнöй наследиекöт. Программаын - творческöй пантасьöммез Коми-Пермяцкоöй округись да Перемись тöдса гижиссезкöт, кукольнöй перформанс «Кудым-Ош» нима легенда сьöртi.
Татöн паськöтасö тематическöй площадкаэзлiсь удж: «Коми-пермяцкая литература: вековой путь» нима литературнöй выставка, округись гижиссез йылiсь архивнöй материаллэзлöн экспозиция, мастер-классэз декоративно-прикладнöй искусство сьöртi, «В гостях у писателя» нима фотозона. Чулалас «Вызовы современного мира и роль литературы в сплочении народов РФ» нима круглый стол гижиссез да регионлöн литературнöй объединеннеэз участиеöн. Помалас программасö «У Сизимка» нима театрлöн спектакль– «Война. Куклы», кöда чулалас Верх-Иньваись КДЦ-ын.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Вежалунся событиеэзлöн программнöй дирекция — Пермский дом народного творчества «Губерния».
Быдöc актуальнöй информация Коми-Пермяцкöй округлöн фестиваллез йылiсь верматö тöдны сайт вылын да социальнöй сеттезын.
Русский