Локтан луннэзö Кудымкарын чулаласö медбöрья мероприятиеэз, йитöмöсь Коми-Пермяцкöй округлöн 100 Волöн итоггезкöт. Юбилейнöй луннэзлöн программа торйöтöм кык медшöр блок вылö: декабрь 19 лунö чулалас деловöй да культурнöй программа, декабря 20 лунö мунасö массовöй вежалунся мероприятиеэз карлöн олiссез да гöссез понда. Событиеэзлöн корöм гöсьöн лоас Россиялöн народнöй артист Дмитрий Певцов.
Декабрь 19 лунö мероприятиеэз лоасö йитöмöсь юбилейнöй волöн итоггезкöт да Коми-Пермяцкöй округлöн зорöтöмлiсь перспективаэз да результаттэз йылicь сёрнитöмкöт. Коми-Пермяцкöй этнокультурнöй центрын чулалас Пермскöй крайись губернатор участиеöн заседаннё, кöда вылын лоасö мыччалöмöсь профильнöй министерствоэзлöн докладдэз да чулöтöмöсь Коми-Пермяцкöй округлöн 100 во сьöртi программа оланö пыртöмлöн итоггез. Сiя жö лунö Коми-Пермяцкöй драматическöй театрын чулалас креативнöй секция, йитöм öння культурнöй да общественнöй инициативаэзкöт. Этнокультурнöй центрын чулалас «Живая нить» нима фестиваль, кöда йитас традиционнöй ремеслоэз да округлicь ловья культурнöй наследие.
П. Субботин-Пермяк нима музейын мöдiк этаж вылын планируйтöм торжественнöй осьтöм экспозициялöн реконструкция бöрын. Сiя лунся деловöй программалöн помöн лоас праздничнöй концерт Дмитрий Певцов участиеöн.
Декабрь 20 лунö Кудымкарын чулаласö массовöй мероприятиеэз, йитöмöсь Коми-Пермяцкöй округлöн 100 Волöн помкöт. Лунлöн медшöр событиеöн лоас Ярмарка гостеприимства, кöда паськöтчас карлöн центральнöй площадь вылын. Ярмарка чулалас евразийскöй йöззэзлöн да культураэзлöн сёрнитöм увья да лоас юбилейнöй волöн медбöрья событиеöн.
Массовöй мероприятиезлöн программа пондöтчас 13:00 часö торговöй ярмарка осьтöмсянь. 14:00 часö пондöтчасö йöзлöн гуляннёэз, специальнöй гöсьöн кöдналöн лоас Российскöй Федерацииялöн народнöй артист Дмитрий Певцов. 18:00 часö вежалун помассяс фейерверкöн.
Мероприятиеэз аркмöтöмöсь Пермскöй крайись губернаторлöн Администрацияöн Пермскöй крайись Коми-Пермяцкöй округлöн уджжез сьöртi Министерство да Кудымкарскöй муниципальнöй округись Администрация, Пермскöй крайись культура сьöртi Министерство отсöтöн.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Сы увья эта во шуöм коми-пермяцкöй кыв Воöн, да вежалунся событиеэз лоисö ыджыт культурнöй программалöн торöн. Вежалунся событиеэзлöн программнöй дирекция — Пермский дом народного творчества «Губерния». Коми-Пермяцкöй округлöн сёвося фестиваллез йылiсь быдöс актуальнöй информациясö верматö тöдны сайт вылын да социальнöй сеттезын..
Русский