Кудымкар порйöтас 87-öт нимлун. День города вылын чулöтасö июль 11 да 12 луннэзö ыджыт программаöн: карлöн площадкаэз вылын чулаласö фестиваллез, театральнöй постановкаэз, спортивнöй турниррез, выставкаэз, кулинарнöй мастер-классэз да товрческöй пантасьöммез.
«Акань»: народнöй памятьлöн да орсанлöн вежалун
Вежалунся мероприятиеэз пондöтчасö июль 11 лунö Культурно-деловöй центрын «Акань» нима нацциональнöй орсанлöн да орсанлöн культуралöн фестивальсянь. Татöн оссяс «Акань-2025» нима аскерöм аканнезлöн конкурс-выставка, чулалас образовательнöй лаборатория, кöда йитöм культурнöй памятькöт, а помассяс лун образовательнöй лабораториялöн участниккез понда «Прогулки с Акань» нима карöт путешествиеöн. Июль 12 лунö чулалас «Кукольные истории» нима частнöй колекциялöн осьтöм, «Подари игрушку» нима благотворительнöй акция, кукольнöй спектакллез да «Сказки из сундука» мыччалöм да участниккезöс аттьöалöм.
Кудымкар движеннёын:: спорт, искусство да лыддьöтöм
Июль 12 лунö медшöр событиеэз паськаласö карлöн кынымкö площадка вылын öтдруг. «Парма» нима стадион вылын чулаласö волейбол, уличнöй баскетбол, теннис сьöртi вермасьöммез. Сэк жö И.Я. Кривощёков нима паркын мунасö «Ловлӧн бикыв» нима литературнöй фестиваль, «Öнас» нима любительскöй театррезлöн фестиваль да «Коми-рыт» нима музыкально-литературнöй представленнё, а сiдзжö гиревöй спорт сьöртi вермасьöммез. Татöн жö öтöрас оссяс «Кудымкар читающий» нима читальнöй зал, кöдаын позяс тöдсасьны небöггезкöт да сернитны гижиссезкöт.
«По стопам Гениев»: Пармалöн геройез петöны öтöрö
Карлöн улицаэзöт мунас «По стопам Гениев» нима театрализованнöй шествие, йитöм округись тöдчана культурнöй деятеллезкöт. Куим колнна — «Заветный клад», «Образ Пармы» и «Локомотив будущего» — йитасö Василиq Климов гижисьлiсь, Виталий Оньков да Петр Субботин-Пермяк cерпасалiссезлicь образзэз. Быдöс колоннаэс пантасясö центральнöй площадь вылын, кытöн 12:30-сянь чулалас День городалöн торжественнöй пондöтчöм официальнöй гöссезлöн да мажореткаэз школалöн участиеöн.
Мывкыда гастрономия: сюрс порция — öтiк шыд
Медвидзчисяна событиеöн лоас гастрономическöй фестиваль, кöдаын Кудымкар мöдö сувтöтны рекорд – лöсьöтны тшакьяшыдлiсь 1000 порция. Кулинарнöй марафон вылын участвуйтны пондасö роч шэф-поваррез: радио да ТВ вылын кулинарнöй программаэз чулöтiсь Илья Лазерсон, Оренбуржьеись кулинаррезлöн ассоциациялöн президент Ильнур Муртазин, Сербияись поваррезлöн ассоциациялöн бренд-шеф Милан Умичевич да Перемись кулинаррезлöн ассоциациялöн президент Лариса Плакхина. Илья Лазерсон сiдзжö чулöтас мастер-класс местнöй продукттэзiсь сёяннэз лöсьöтöм сьöртi да автограф-сессия.
Сцена быдöc понда: фолксянь дефилеöдз
Центральнöй площадь лоас медшöр концертнöй площадкаöн. Татöн чулалас «Живое дыхание старинной традиции» нима конкурслöн гала-концерт, «Гажа гуляночка» нима мыччасясö Сыктывкарись ансамбль да Кудымкарись творческöй коллективвез. Сiдзжö оссяс «Город мастеров» нима ремеслоэзлöн фестиваль да «Кипода морт» нима конкурс, кöдаын мастеррез мыччаласö ассиныс керöмторрез да чулöтасö мастер-классэз. Гöссез вермасö не только тöдсасьны ремесленнöй традицияэзкöт, но и босьтны ассяма сувениррез ярмарка вылын.
Вöвлытöмторрезлöн кар: мифология Кудымкарлöн улицаэзын
«Ловья Пу» нима фестиваль пулöн резьба сьöртi мыччалö коми-пермяцкöй культуралiсь унавекся традицияэз. Резчиккезлöн удж бöрын Коми-Пермяцкöй этнокультурнöй центрлöн паркын День города кежö аркмасö виль арт-объекттэз.
Рыт — кыдз медбöрья аккорд
Рытнас вежалун вылын чулалас «Акань шоу: модная кукла» нима моднöй имидж-дефиле, «Кружево» нима группалöн фолк-шоу, Наталья Шнайдерлöн да «Мята» нима шоу-балетлöн мыччасьöм.
«Мийö кöсйимö, медбы День города лоис событиеöн, кöда йитö поколеннёэз, öзтö интерес чужан культура дынö. Программа петiс паськыт, унаслоя да ловья. Эта вежалун быдöс понда – челядь, аймам, томпöлöс, Кудымкарись гöссез да олiссез понда», - пасйис округлöн юралiсь Наталья Сикорская.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Фото 3: Ловья Пу, автор — Наталья Аксентьева
Фото 4: Шаньги, автор — Наталья Аксентьева
Русский