Кудымкарын этнокультурнöй центрлöн сцена вылын ноябрь 14 лунö чулалас «Новая коми-пермяцкая песня» нима гала-концерт – музыкальнöй конкурслöн, кöда йитöм округлöн 100 вокöт, пом. Ашынас, ноябрь 15 лунö, Мижуева деревня панталас гöссезöс «Лён вежалунöн»– с мастер-шоуöн, сурлöн дегустацияöн, ярмаркаöн да сказочнöй представленнёэзöн. Коми-Пермяцкöй этнокультурнöй центрсянь кыкнан событие öтлаöтас округись олiссезöс да гöссезöс коми-пермяцкöй культура, музыка да народнöй традицияэз гöгöр.
«Новая коми-пермяцкая песня» нима гала-концерт (0+)
Лун да кад: ноябрь 14 лунö 19:00 часö.
Места: Коми-Пермяцкöй этнокультурнöй центр (Кудымкар, ул. Студенческая, 9).
«Новая коми-пермяцкая песня» нима гала-концерт помалас конкурс, кöда йитiс быдöс регионiсь авторрезöc да исполнителлезöс. Сылöн медшöр мог – отсавны артисттэзлö, кöдна сьылöны коми-пермяцкöй кыв вылын, да сетны вдохновеннё авторрезлö чужан му йылiсь виль сьыланкыввез вылö.
Конкурс öктiс профессиональнöй музыканттэзöс да любителлезöс. Участниккез мыччалiсö ассиныс уджжезнысö кык номинацияын: «Виль сьыланкыв» – оригинальнöй тексттэз да коми-пермяцкöй кыв вылын мелодияэз, да «Вильсьӧтӧм сьыланкыв» – тöдса композицияэз виль аранжировкаын или вуджöтöмöсь коми-пермяцкöй кыв вылö. Уджжезлöн медшöр тема – чужан му дынö, сылöн басöк дынö, кыв дынö радейтöм.
Гала-концерт вылын мыччасясö тöдса коми-пермяцкöй сьылiссез, кöдна коласын Анастасия Ларцева, Евгений Климов, вокальнöй дуэт «Бичирок», Дарья Калина, вокальнöй ансамбль «Земляки» Татьяна Баранова кипод увтын, Полина Старикова, а сiдзжö блогер Алина Климова, ансамбль «Лысваок» да мöдiк артисттэз.
«Лён вежалун» (0+)
Лун да кад: ноябрь 15 лунö 12:00 часö.
Места: д. Мижуева, Мижуевскöй сельскöй дом культуры (217 км от Перми).
Мижуева деревняын чулалас «Лён вежалун» – фестиваль, йитöм лён быдтöмлöн да обработкалöн важ коми-пермяцкöй традицияэзкöт. Гöссезöс видзчисьö мастер-шоу «От льна-долгунца до полотна», кытöн мыччаласö лён обработкалöн быдса цикл засянь готовöй тканьöдз. Пермскöй маслодел Алекс Потапов чулöтас мастер-класс холоднöй отжима льнянöй ви керöм сьöртi, а дегустационнöй площадка вылын позяс пешлыны коми-пермяккезлiсь национальнöй юан – сур.
Сiдзжö гöссезöс видзчисьöны интеллектуальнöй площадка «Льняной турнир», театрализованнöй сказка «Как Матрёна-силачка разбойника одолела», «Калинка» да «Калинушка» коллективвезлöн концерт, а сiдзжö «ЭтноМода» коллекцияэзлöн мыччалöм, мастер-классэз да орсан зонаэз быдöс семья понда.
Аркмöтöм трансфер мероприятие чулöтöм местаöдз. Коми-Пермяцкöй этнокультурнöй центрсянь петöны ноябрь 15 лунö 11:00 часö. Автобусын местаэз бронируйтны позьö номерöт: 8 (34 260) 4-76-19 (Ольга Ивановна).
«Коми-пермяцкöй сьыланкыввез, кыв, ремеслоэз да ловья сёрнитöм пырйöт мийö колямö да зорöтамö сiйö, мый керö миянлicь округ ассямаöн. Сэтшöм событиеэз, кыдз «Новая коми-пермяцкая песня» да «Лён вежалун» уськöтöны тöдвылö, мый традицияэз – это миян оланлöн тор, кöда öнöдз öтлаöтö отирсö да тыртö сiйö смыслöг да шонытöн», – пасйö Коми-Пермяцкöй этнокультурнöй центрись юралiсь Мария Носкова.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Эта во шуöм коми-пермяцкöй кыв Воöн, да вежалунся мероприятиеэс лоисö торöн ыджыт культурнöй программалöн. Вежалунся событиеэзлöн организацияöн да программнöй дирекцияöн занимайтчö Пермский дом народного творчества «Губерния».
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Русский