«Кристалл» нима молодёжнöй центрын кольöм шоччисян лунö чулалiс «Менам пас» нима коми-пермяцкöй культуралöн фестиваль-мастерскöй. Мероприятиелöн гöссез тöдсасисö важ родовöй знаккезлöн – пассэзлöн – система йылicь, велöтчисö йöктыны тупи-тап, кывзiсö лекцияэз мифология да традицияэз йылiсь, участвуйтiсö мастер-классэзын, адззылiсö этническöй костюммезлöн да горт берсялöн выставка. Аркмöтiсьöн лоис коми-пермяцкöй общественнöй организация «Ма» Перемись администрация отсöтöн.
Участниккезлö öддьöнжык гленитчис мастер-классэзлöн кык блок, кöдна нуöтiсö исследователлез, культуралöн носителлез да творческöй коллективвез. Фольклорнöй ансамбль «Мича асыв» Ыджыт Коча посадicь осьтiс программа аслас чьыланкыввезöн да чулöтiс мастер-класс тупи-тап сьöртi, а сiдзжö тöдсöтiс гöссезöс деревенскöй коми-пермяцкöй сёяннэзкöт. Режиссёр да документальнöй фильммезлöн автор Надежда Климова висьтасис этническöй видеоконтентлöн кыдз традицияэз зорöтöмлöн öння инструмент аркмöтöм йылiсь. Кекурись «Учительскöй керкулöн» да «КАК? ТАК!» нима АНО-лöн юралiсь Ирина Баяндина чулöтiс интерактивнöй игровöй мастерскöй, йитöм культурак тöдсöтöмкöт орсан да взаимодействие пырйöт.
Лексика да фольклор öктiсь, «Кинкӧ. Путешествие в мифологию коми-пермяков» нима арт-резиденциялöн юралicь Анастасия Кротова-Гарина торйöтчис тöдöммезöн коми-пермяцкöй мифология да сылöн образзэз йылiсь. Фольклорлöн исполнительница, дизайнер да «JULIM» нима блоглöн автор Даша Калина чулöтiс «Три узелка, или Тайна коми-пермяцкого костюма» нима лекция-беседа, йитöм традиционнöй паськöмкöт да сылöн пытшкись вежöртассэзкöт. «JULIM» нима блоглöн команда висьтасис участниккезлö, кыдз велöтны коми-пермяцкöй кывлiсь основаэз час коста.
«“Менам пас” — это вермöм павкöтчыны коми-пермяцкöй культуралöн богатство дынö Перемын. Мийö аркмöтiмö программа, кытöн быдöс позьö адззывны, кывны да пешлыны аслыныс, сiйöн что традицияэзлö колö лоны ловьяэзöн. Мийö радöсь быд гöсьлö — и нылö, кин быдмис эта культуракöт, и нылö, кин осьтö сiйö медодззаись», — пасйис Екатерина Федосеева, «Ма» нима коми-пермяккез молодежнöй общественнöй организациялöн представитель.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Сы увья эта во шуöм коми-пермяцкöй кыв Воöн, да вежалунся событиеэз лоисö ыджыт культурнöй программалöн торöн. Вежалунся событиеэзлöн программнöй дирекция — Пермский дом народного творчества «Губерния».
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Русский