Литературнöй пантасьöммез чулалiсö кольöм луннэзö Москваын «Пармалöн вужжез» проект сьöртi. Коми-Пермяцкöй округись гижиссез висьтасисö важ легендаэз йылiсь да Пармалöн геройез йылiсь, сьылiсö сьыланкыввез чужан кыв вылын да мыччалiсö национальнöй костюммез. Гöссез сiдзжö участвйтiсö круглöй столын, йитöм коми-пермяцкöй кыв зорöтöмкöт, и чулöтiсö поэзиялiсь рыт. Проект йитöм Коми-Пермяцкöй округлöн 100 вокöт да коми-пермяцкöй кывлöн Вокöт.
Пантасьöммез чулалiсö Российскöй государственнöй детскöй библиотекаын да Первöй Московскöй образовательнöй комплексын. Коми-Пермяцкöй округись гижиссез Елена Коньшина, Надежда Мальцева, Ирина Дульцева, а сiдзжö активнöй координаторрез да проектнöй деятельностьлöн аркмöтiссез Людмила Зубова да Вера Боталова висьтсисö Пармаись йöззэзлöн культура да традицияэз йылiсь. Челядь кывзiс сказаннёэз богатыррез йылiсь да вöрись духхез йылiсь, тöдiс, кыдз кывсьö коми-пермяцкöй кыв, и нельки пондылiс велöтны кынымкö кыв.
Сьöлöмвöрзьöтанаöн лоис Кудымкар йылicь – Коми-Пермяцкöй округлöн юркар йылicь сьыланкыв, кöдö сьылiсö «Пермяцкöй землячестволöн» активисткаэз роч да коми-пермяцкöй кыввез вылын. Гижиссез мыччалiсö важ орнаменттэз да национальнöй костюммезлicь торрез, а челядь участвуйтic народнöй орсннэзын да викторинаэзын.
«Московский Дом национальностей»-ын чулалiс круглöй стол, йитöм коми-пермяцкöй кыв да литература зорöтöмкöт, а сiдзжö тöдса коми-пермяцкöй гижиссезкöт да ны творчествокöт. Татöн мыччалiсö Валентина Ершовалiсь «Вышивка в костюмах коми-пермяков. Кочёвский район» нима небöг. Сёрнитöмын участвуйтiсö «Пермяцкöй землячестволöн» да удмуртскöй диаспоралöн представителлез.
Программа помассис «Ов да зорам менам горт, менам Парма» нима поэзиялöн рытöн. Сцена вылын кылiсö коми-пермяцкöй авторрезлöн кывбуррез, народнöй мелодияэз да чужан кыв йылiсь сьыланкыввез.
Гортö локтöм бöрын проектлöн участниккез пондöтiсö удж «Пармалöн шыэз» нима виль литературно-художественнöй альманах вылын. Сборник мöдöны презентуйтны Коми-Пермяцкöй округись школаэзын.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».Всю актуальную информацию о фестивалях 100-летия Коми-Пермяцкого округа вы можете узнать на сайте и в социальных сетях.
Русский