perna_min
Секундочку / Вдадзчдась ӧтік секунда

Коми-Пермяцкöй округлöн сё во кежö туроператоррез лэдзисö юбилейнöй маршруттэз

Туррез отсалöны пыдынжыка пырны коми-пермяккез историяö, кылö, кухняö да мифологияö. Öтiк лунся экскурсияэзкöт ордчöн аркмисö экспедицияэз 2-5 лун кежö округись ылын деревняэзö, кöднаын эшö кольччö быдпырся олан, например, Пожва, Гайны, Коса. Туристтэз тöдсасьöны местнöй достопримечательносттезкöт да участвуйтöны обряддэзын, мастер-классэзын да этнографическöй спектакллезын.  

Туроператоррез паськöтiсö маршруттэзлiсь географиясö. Öнi экскурсияэз чулалöны не только Кудымкарын да матiсь деревняэзын. Юбилейся туррез босьтöны быдöc Коми-Пермяцкöй округ. Программаын – ылын населеннöй пункктэзö мунöм, сэтшöм кыдз Пожва, Гайны, Коса. Сэтчин путешественниккез тöдсасьöны округись деревенскöй оланöн да вöрваöн. Экскурсияэз чулалöны кыдз интерактивнöй мероприятиеэз, кытöн туристтэз асьныс лоöны процесслöн участниккезöн. Нiя öктöны ойвывся ягöддэз, велöтчöны заптыны веськöтан туруннэз, тöдсасьöны коми-пермяцкöй письменностькöт.

Популярнöйжыкöн лоöны гастрономическöй туррез Коми-Пермяцкöй округ пасьта. Туристтэзöс корöны не только пешлыны местнöй кухня, но и велöтчыны пуны-пöжавны деревняэзiсь олiссезкöт. Кудымкарын да Пармайловоын керöны пельняннез, Мижуеваын пуöны сур, Гуринаын – пöжалöны нянь горын. Путешественниккез павжнайтöны керкуэзын, участвуйтöны застольеэзын да пешлöны вöрись кухнялöн быдпырся сёян: кöктоина каша, льöмись пирöггез, вежягöдiсь вареннё да вöрмöсiсь гуляш. Сэтшöм туррез чулалöны 1-2 лун коста.

Дженыт театральнöй туррез Коми-Пермяцкöй округ пасьта кольччöны коланаэзöн да юбилейся воö лоисö обзорнöй экскурсияэзлöн культурнöй программаын торöн. Туристтэз пырöны Коми-Пермяцкöй национальнöй театрö, кытöн видзöтöны спектакллез коми-пермяцкöй кыв вылын да шедöны закулисьеö, медбы тöдсасьны историякöт.

«Коми-Пермяцкöй округлöн юбилей ловзьöтiс спрос эта туристическöй направленнё вылö. Туристтэзлöн эм кöсйöм вежöртны, мый нiя ветлiсö не просто экскурсия вылö, а пыралiсö мöдiк культурнöй средаö. Ны понда колана вöрзьöтны аутентичнöй культура, тöдсасьны коми-пермяккезлöн легендаэзкöт да пермскöй зверинöй стилькöт, пешлыны национальнöй сёяннэз», - пасйö Светлана Устинова, ООО «ТК РаСвет»-iсь юралiсь.

Туррезлöн дон сувтöтчö чулöтöм кад сьöртi. Öтiклунся маршрутыс сувтас 4 300-сянь 6 000 рубöдз. Кыклунся программа - 12 500 – 15 200 руб гöгöр. Меддырся тур чулалö вит лун коста и сулалö 27 100 руб.

Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния». 

Фотоэзлöн автор: Евгений Климов.

ru_RUРусский
Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять