П.И. Субботин-Пермяк нима Коми-Пермяцкöй краеведческöй музейын осьтiсö «Пера Маа отир. Люди Дальней Земли» нима экспозициялiсь мöдiк тор. Торыс «Средний мир. Этнографическое наследие» ним увтын висьтасьö коми-пермяккезлöн олан йылiсь XVI вексянь XX век пондöтчöмöдз да мыччалö, кыдз аркмис нылöн быт, традицияэз да олан вылö дзарньöв.
Проектлöн научнöй юралiсьöн лоö Александр Черных, Российскöй Академия Наукись Уральскöй отделеннёлöн гуманитарнöй исследованнеэзлöн Институтлöн директор, РАН-лöн профессор, историческöй наукаэзлöн доктор. Куратор – Ольга Сафрошенко, «Люди Дальней земли – пера Маа Отир» проектлöн продюсер.
«Пера Маа отир. Люди Дальней Земли» нима экспозициялöн мöдiк торлöн осьтöм аркмис «Люди Дальней земли – пера Маа Отир» грантовöй проект сьöртi, кöда чулöтсьö «Общество радетелей коми-пермяцкого языка и культуры «Югор» нима Пермскöй региональнöй общественнöй организацияöн культурнöй инициативаэзлöн Президентскöй фонд отсöтöн.
Экспозиция аркмöтöм коми-пермяккезлöн быдпырся олан сьöртi. Гöссезлö мыччалöны, кыдз отир олiс Пармалöн вöррезын, нуöтiс хозяйство да велалic овны сьöкыт условиеэзын. Медшöрыс – крестьянскöй семьяэзлöн, кöдна уна век сьöрна вöлiсö медшöр населеннёöн татöн, му вылын удж да быт.
Заллэзын позьö адззывны коми-пермяккезлiсь удж понда берся, кöда коласын и борона-суковатка – сельскохозяйственнöй тягловöй орудие му обработка понда, а сiдзжö традиционнöй телега пуись керöм колесоэз вылын. Торья экспозиция йитöм Кудым-Ошкöт – тöдчана геройкöт да Кудымкарлöн основателькöт. Экспозицияын мыччалöм богатырь, кöда гöрö му. Преданнёэз сьöртi, именно Кудым-Ош вайис лунвывся муэзicь шогдi да зöр туссез да козьналic нiйöс аслас отирлö.
Эшö öтiк тор йитöм коми-пермяккезлöн верованнёэзкöт да нылжн олан вылö дзарньöвкöт. Экспозиция мыччалö, кыдз сэтшöм дзарньöвыс оссис быдпырся оланын – вежалуннэзын, обряддэзын да народнöй паськöмын. Татöн жö мыччалöм традиционнöй костюм. Коми-пермяккезлöн костюмын эмöсь рöма элементтэз – йиэз да кушаккез, кöднö пасьатвлiсö вежалуннэз коста, кöть и оланыс вöлi сьöкыт.
Торья пространствоын крестьянскöй изба –керку, кöдö вайисö музейö 1962 воö. Эта экспонат пыр гленитчö гöссезлö.
Экспозициясö содтöны поселеннёэзлöн макеттэз, фольклорнöй источниккезicь да мультимедийнöй программаэзiсь материаллэз, кöдна йитöмöсь Коми-Пермяцкöй округись населённöй пункттэз аркмöмлöн историякöт.
Музейись директор Елена Дунина висьталö, мый мöдiк тор лоис эшö öтiк этапöн ыджыт уджлöн экспозиция вильсьöтöмын. ««Средний мир»-ын мийö пондöтамö сернитöм морт йылiсь – сы йылiсь, кыдз олiс крестьяна эта му вылын, кыдз нуöтiс хозяйство, мыйö веритiс да кыдз видзис ассис традицияэсö. Миян понда коланаöн вöлi мыччавны не торья берся, а коми-пермяккез унавекся оланлöн быдса серпас», – пасйис Елена Дунина.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Сы увья эта во шуöм коми-пермяцкöй кыв Воöн, да вежалунся событиеэз лоисö ыджыт культурнöй программалöн торöн. Вежалунся событиеэзлöн программнöй дирекция — Пермский дом народного творчества «Губерния».
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Информационнöй справка:
«Пера Маа отир. Люди Дальней Земли» нима экспозициялöн медодзза тор оссис Коми-Пермяцкöй музейын 2025 вося июльын. Экспозиция йитöм куим мир йылiсь финно-угорскöй мифкöт — увтiсь, шöрись да вевдöрись — да паськöтöм музейлöн куим этаж вылын. Экспозициялöн медбöрья тор – «Верхний мир» – лоас йитöм Петр Иванович Субботин-Пермяккöт, художниккöт да коми-пермяцкöй культурнöй наследие öктiськöт.
Русский