Перемын да Кудымкарын оссяс öткоста кык выставка, йитöм коми-пермяккез мифологиякöт
Перемын А. М. Горький нима библиотекаын пондöтчö Светлана Паниналöн «Ab ovo» нима персональнöй выставка, вдохновлённöй коми-пермяккез легендаэзöн. Кудымкарын КДЦ-лöн выставочнöй залын мыччаласö «Несказки» нима «Кинкӧ. Путешествие в мифологию коми-пермяков» арт-резиденциялiсь коллективнöй экспозиция. Видзöтiссезöс видзчисьöны ассяма уджжез, интерактивнöй экскурсияэз да серпасалiссезкöт пантасьöммез, кöдна йитöны традицияэз да öння искусство. Выставка йитöм Коми-Пермяцкöй округлöн 100 вокöт.
«Ab ovo» Перемын
Светлана Панина босьтö коми-пермяккезлiсь да славяналiсь важ преданнёэз. Сы уджжезын позьö пантавны волшебнöй кайезлiсь, вöрвалöн духхезлiсь да важ сказаннёэзлiсь образзэз. Öтiк медшöр фигура ныись — тöдiсь Чикыш, кöдö серпасалiсь мыччалö кыдз öння инькаöс, кöдалöн эм аслас культуракöт да национальнöй вужжезкöт йитöт.
Места: А.М. Горький нима Пермскöй краевöй библиотека (ул. Ленина, 70).
Кад: ноябрь 1-20 луннэзö.
Этö мöдiк öтласа проект Горькöй библиотекалöн да Светлана Паниналöн. Медодзза выставка бура гленитчис публикалö. Аркмöтiссез висьталöны, мый видзöтiссезлöн синнэз усьöны югыт рöммез, ассяма визуальнöй эффекттэз да мифологическöй сюжеттэзлöн подача вылö.
Ноябрьын библиотекалöн сотрудниккез чулöтасö экскурсияэз выставка сьöртi. «Ночь искусств» нима всероссийскöй акция сьöртi ноябрь 3 лунö мöдöны чулöтны пантасьöм авторкöт.
«Менö вдохновляйтö коми-пермяккезлöн культура — сыын эм мулöн вын, мортлöн вöрвакöт да предоккезлöн тöдвывкöт йитöт, — висьтасьö Светлана Панина. — Менам мам Коми-Пермяцкöй округись, учöтсянь ме кылi сказаннёэз да легендаэз, кöдна висьтассисö миян семьяын. Сыбöрын сiя лоис менам творчестволöн медшöр торöн. Талун ме юрала «Шонди-арт» мастерскöйöн, кытöн аслам методикаöн велöта челядьöс серпасавны. Мийö велöтамö Прикамьеись йöззэзлiсь мифология да акрмöтамö серпассэз, вдохновлённöйöсь этна историяэзöн. Меным колö, медбы искусство пырйöт кольччис поколеннёэзлöн йитöт да уваженнё аслат историческöй вужжез дынö».
Перемын экспозиция помалöм бöрын проект «Ab ovo» мыччаласö Кунгурын.
«Несказки» Кудымкарын
Ашын, ноябрь 1 лунö, Кудымкарись КДЦ-лöн выставочнöй залын чулалас «Кинкӧ. Путешествие в мифологию коми-пермяков» нима арт-резиденциялöн удж коста аркмöм серпассэзлöн выставка осьтöм. Выставка вылын мыччаласö уджжез, керöмöсь коми-пермяцкöй мифология мотиввез сьöртi Россиялöн быдкодь регионнэзiсь серпасалiссезöн. Проектлöн юралiсь — исследователь, лексика да фольклор öктiсь, коми-пермяцкöй культуралöн популяризатор Анастасия Кротова-Гарина.
Места: Культурно-деловöй центр (Кудымкар, ул. 50 лет Октября, 12).
Кад: быдöс ноябрь
Арт-резиденция — «Точка на карте. Точка интереса» программалöн проект, кöда чулöтсьö Перемскöй крайись культура сьöртi Министерств отсöтöн.
Шедны Ирина Вилесовалöн, проектлöн участницалöн, да Анастасия Кротова-Гариналöн, проектлöн юралiсьлöн, авторскöй экскурсия вылö позьö одзлань гижсьöм бöрын: +7 951 953 67 22.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Быдöc актуальнöй информация Коми-Пермяцкöй округлöн фестиваллез йылiсь верматö тöдны сайт вылын да социальнöй сеттезын.
Русский