Молодёжнöй центр «Кристалл» ноября 22 лунö лоас площадкаöн «Менам пас» нима фестивальнöй мастерскöйлöн – событиелöн, кöда йитöм Коми-Пермяцкöй округлöн 100 вокöт. Гöссезöс видзчисьöны коми-пермяккез культура да мифология йылiсь лекцияэз, творческöй мастер-классэз, народнöй орсаннэз, а сiдзжö этническöй костюммезлöн да горт берсялöн выставка. Аркмöтiсьöн лоö Коми-пермяцкöй общественнöй организация «Ма» Перемись администрация отöтöн.
Фестиваль «Менам пас» (6+) тöдсöтас гöссезöс коми-пермяк увтыррезлöн пассэзкöт. Этö графическöй символлэз, кöдна вöлiсö кыдз обереггез да увтырлöн серрез. Нiйö тэчлiсö паськöм вылö, горт берся вылö, горт гöгöр да вöралан угодьеэзö, медбы орддьыны умöль выннэз да шогöттэз.
Лун да кад: ноябрь 22 лунö 12:00-сянь 16:00-öдз.
Места: Молодёжнöй центр «Кристалл» (Комсомольский проспект, 53).
Мастерскöй коста чулаласö тематическöй лекцияэз, йитöмöсь коми-пермяккез мифологиякöт, пассэзлöн историякöт да нылöн вежöртассэзкöт. Эксперттэз висьтасясö, кыдз пассэз пыртiсö оланö да обряддэзö, мыйöн нiя вöлiсö семья понда да мыля олiсö уна воэз коста.
Творческöй мастер-классэз вылын участниккез тöдсасясö национальнöй паськöмкöт, велöтасö традиционнöй движеннёэз народнöй йöктаннэзын да кынымкö фраза коми-пермяцкöй кыв вылын. Челядь понда да ыджыттэз понда лöсьöтöмöсь народнöй орсаннэз.
Этническöй костюммезлöн да гортись берся выставка вылын гöссез адззыласö традиционнöй тканнез, украшеннёэз, бекöрпань даи инструменттэз, кöдна вöлiсö коми-пермяккезлöн деревенскöй оланын. Экспонаттэз позяс видзöтны матын да фотографируйтны.
Концертнöй программаын мыччасяс «Мича асыв» нима фольклорнöй ансамбль да творческöй объединеннё «Кай». Помассяс фестиваль коми-пермяцкöй сёяннэзлöн дегустацияöн. Участие сьöмтöм.
«Менам пас» – этö вермöм тöдсасьны коми-пермяцкöй культуралöн богатствоöн Перемын. Мийö лöсьöтiмö программа, кытöн позьö быдöс адззывны, кывны да пешлыны аслыныс, сiйöн мый традицияэзлö колö лоны ловьяэзöн. Пондамö видзчисьны быд гöсьöс: нiйöс, кин быдмис коми-пермяцкöй культуракöт, и нiйöс, кин осьтас аслыс сiйö медодззаись. Медшöр – интерес да открытость», – пасйис Екатерина Федосеева, «Ма» нима Перемын коми-пермяккезлöн молодежнöй общественнöй организациялöн представитель.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Сы увья эта во шуöм коми-пермяцкöй кыв Воöн, да вежалунся событиеэз лоисö ыджыт культурнöй программалöн торöн. Вежалунся событиеэзлöн программнöй дирекция — Пермский дом народного творчества «Губерния».
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Русский