Том пермскöй серпасалiсьлöн Дарья Обириналöн персональнöй экспозиция йитöм коми-пермяцкöй мифологическöй существоэзлöн да народнöй преданнёэзлöн миркöт. Проект корö видзöтiссезöс тöсасьны коми-пермяккезлöн ассяма культуракöт. Выставка чулöтсьö октябрь 26 лунöдз.
«1500 лет чудей» нима серпассэзлöн серия йитсьö коми-пермяцкöй легендаэзкöт, народнöй сказкаэзкöт да мистическöй обряддэзкöт. Серпасалiсь вежöртöтö устнöй преданнёэз, кöдна вуджисö поколеннёись поколеннёö, вуджöтö нiйö холст вылын образзэзö.
Места: Международная школа рисования GRAFIKA (Санкт-Петербург, ул, Кирочная, 6).
Время: 10.00-сянь 21.00-öдз.
Дарь Обирина висьталö, мый проектлöн идея чужис семейнöй воспоминаннёэзicь да челядькадся впечатленнёэзiсь. Серпасалiсь уськöтö тöдвылö, мый именно айлöн висьттэз олан йылiсь да коми-пермяккезлöн поверьёэз йылiсь отсалiсö сылö гижны серпассэз.
«Медодззаись ме кылi сэтшöм ассяма отир йылiсь папöсянь – сiя коми-пермяк. Челядь кадын новйöтiс менö аслас чужан муэзöт да висьтаслiс уна интереснöйcö да вöвлытöмсö. Наста-колдунья йылiсь, кöда петiс вöрись, джодж увтiсь куллез йылiсь, менам прабаб-икотка йылiсь, и учöт мулöн уна мöдiк ассямаэз йылiсь. Челядь кадö меным эзö öддьöн интересуйтö сылöн висьттэз – сказкаэз да и сказкаэз. Öнi жö ме вежöртi, кыдз колана менам история. Колана история менам родвужлöн, учöт чужан мулöн да и вообще, кин олiс миян вотöдз? Кин гуляйтiс иззэзöт? Кин ветлöтi пуись керöм храммезö? Быдöc этö интересно адззывны! Сiдз ме и пондöтi уджжезöлiсь кузь серия», - торйöтчö Дарья Обирина.
Одзжык «1500 лет чудей» нима проект вöлi мыччалöм Кудымкарись Коми-Пермяцкöй этнокультурнöй центрын да А. М. Горький нима библиотекаын Перемын. Петербургскöй экспозиция лоис виль этапöн эта сериялöн зорамöмын, йитöм коми-пермяккез культурнöй наследиелöн популяризациякöт.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Вежалунся событиеэзлöн программнöй дирекция — Пермский дом народного творчества «Губерния».
Быдöc актуальнöй информация Коми-Пермяцкöй округлöн фестиваллез йылiсь верматö тöдны сайт вылын да социальнöй сеттезын.
Русский