Национальнöй коллективвез, сьылiссез да творческöй деятеллез локтасö Перем крайö октябрь 15-18 луннэзö «Финно-угорский транзит» нима Международнöй фестивальлöн площадкаэз вылö. Таво фестиваль «Новые ритмы традиций» тематическöй ним увтын пöдналö ассис öкмысöт кыквося сезон, кытöн участниккез мыччаласö öння национальнöй песеннöй творчество, авторскöй сьыланкыввез, композицияэз техноаранжировкаын да каверрез.
««Новые ритмы традиций» нима направленнёлöн идея локтic öнняся томпöлöссянь. Нешоча музыкальнöй новинкаэзын тыдалö фольклорлöн интерпретация — былись повтöм сёрнитöм, кöр «дань уважения прошлому», архаичнöй напев пантасьö авторскöй аранжировкакöт да электроннöй музыкакöт. Сiдз кольччöм мотиввез, преданнёэз да легендаэз вежöны народнöй творчествосö актуальнöй шыö», – пасйис Татьяна Барахова, «Финно-угорский транзит» нима Международнöй фестивались оргкомитетлöн председатель.
Октябрь 16 лунö «Губерния» нима краевöй учрежденнёын чулаласö тематическöй секцияэз докладдэзöн да пресс-конференция, йитöм В.Д. Поленов нима ГРДНТ-лöн 110 вокöт, а сыбöрын участниккез мунасö карö, кöда лыддиссьö коми-пермяцкöй культуралöн центрöн – Кудымкарö. Кудымкарись Коми-Пермяцкöй этнокультурнöй центрын пондас уджавны приоритетнöй программаэзлöн сектор Россияись регионнэзiсь да Беларусь Республикаись эксперттэзлöн участиеöн, «Шондiбан» нима Коми-Пермяцкöй ансамбльсянь да финно-угорскöй транзитлöн мöдiк участниккезсянь творческöй лабораторияэз. Сiдзжö чулаласö концерттэз Кудымкарын да Юсьваын.
Финно-угорскöй транзитлöн медшöр мероприятиеэз паськаласö октябрь 17 лунö Кудымкарись Культурно-Деловöй центрын – карлöн олiссез да гöссез пырасö Россияись да Беларусь Республикаись йöззэз культураэзлöн ассамаэзö. Лоас выставка, йитöм Коми-Пермяцкöй округлöн 100 вок;т, коми-пермяцкöй кипода морттэзöн керöм сувениррезлöн вузалöм да музыкально-инструментальнöй творчество йылiсь фотовыставка. Лыддьöтны райдейтiссез вермасö тöдсасьны Россияись йöззэзлöн национальнöй кыввез вылын финно-угорскöй изданнёэзкöт.
Медвидзчисяна событие – «Финно-угорскöй транзитлöн» гала-концерт чулалас 18:00 часö. Видзöтiссез одзын мыччасясö Карелия Республикаись «Зоряйне» нима ансамбль, Марина Садовничая Донецкöй Народнöй Республикаись, Анастасия Бояренева Беларусь Республикаись, Марий Элiсь «Пеледыш» нима песнялöн да танецлöн народнöй ансамбль, Коми-Пермяцкöй ансамбль «Шондiбан», ансамбль «Шудбур» Удмуртия Республикаись, «Любо» нима авторскöй казачöй песнялöн народнöй ансамбль, (заочно), Мордовияись этно-фолк группа «Пувама» да Москваись Анастасия Ларцева. Медуна участник локтас Коми Республикаись: сьылiссез Владимир Трошев да гармонист Захар Петрушин, Яна Сажина, Виктор Уляшев, Алексей Исаков, а сiдзжö группа «Йöй», ансамбль «Томлун» да Сыктывкарись сервислöн да связьлöн колледжись Театр моды.
Уськöтамö тöдвылö, мый «Финно-угорский транзит» нима искусстволöн да народнöй творчестволöн Международнöй фестиваль «Новые ритмы традиций» тема увтын пондöтчис одзза воö – Коми Республикаын, сэсся участниккез мыччасисö Республика Мордовияын да Москваын. Перем крайын лабораторияись участниккез да эксперттэз понда лöсьöтöм насыщеннöй программа – экскурсияэз, культурно-досуговöй учрежденнёэзö пыралöм, М. Горькöй нима Коми-Пермяцкöй Национальнöй драматическöй театр, Субботин-Пермяк нима музей.
Фестивальлöн аркмöтiссез: Российскöй Федерацияись культуры сьöртi Министерство, В.Д. Поленов нима Государственнöй Российскöй Дом народного творчества, Перем крайись культура сьöртi Министерство, «Губерния» нима Дом народного творчества Пермского края, Перем крайись Коми-Пермяцкöй округлöн уджжез сьöртi Министерство, ГКБУК «Коми-Пермяцкий этнокультурный центр», Российскöй Федерацияись финно-угорскöй йöззэзлöн Ассоциация, межэтническöй журналистикалöн Гильдиялöн Коми региональнöй отделеннё.
Русский