Ыджыт вежалун Юрлинскöй культурно-досуговöй центрын öтлаöтiс кык тöдчана дата — Коми-Пермяцкöй округлöн сё во да Юрлинскöй историко-краеведческöй музейлöн аркмöтöмсянь 45 во.
Шоныт кöсйöммез Юрлинскöй районiсь олiссезлö видеопоздравленнёын висьталiс Перем крайись губернатор Дмитрий Махонин. Медшöр сценасянь юрлинсалö бур кыввез висьталiсö Коми-Пермяцкöй округись юралiсь Алексей Плотников да Юрлинскöй муниципальнöй округись юралiсь туйö пуктöм Екатерина Верхоланцева. Нiя козьналiсö округись олiccезлö наградаэз чужан мулöн культурнöй да социально-экономическöй зорöтöм понда.
Праздничнöй программа пыртiс ас пытшкö местнöй творческöй коллективвезлicm, торья сьылiссезлiсь да «Шондiбанлiсь» выступленнёэз.
Юрлинскöй районiсь КДЦ-лöн фойеын олiссез тöдсасисö «Коми-пермяцкая литература: вековой путь» нима выставкакöт, кöда аркмöтöм М.П.Лихачев нима коми-пермяцкöй центральнöй национальнöй библиотекаöн. Проект йитöм коми-пермяцкöй литературалöн сёвося историякöт: босьтö кад XX веклöн пондöтчöмсянь миян луннэзöдз, мыччалö коми-пермяккезлiсь литературнöй творчестволöн зорамöм.
Юрлинскöй районын керöны быдöс, медбы зорöтны одзлань регионлiсь культурнöй наследие, кольны тöдвылö татöн олiсь йöззэзлiсь история да традицияэз, коми-пермяккезлiсь культура. Этна уджжезлöн медшöр местаöн лоö Юрлинскöй историко-краеведческöй музей. Сiя вöлi осьтöм 1980 воö олiccез да креаеведдэз отсöтöн.
Музейлöн экспозиции мыччалö коми-пермяккезлiсь быт, обычайез да традицияэз. Экспонаттэзöн лоöны национальнöй паськöм, украшеннёэз, музыкальнöй инструменттэз да ремесленнöй берся. Сiдзжö музейын позьö адззывны местнöй значеннёа искусстволöн произведеннеэзлiсь коллекция: живопись, графика, скульптура да декоративно-прикладнöй творчество.
Юрлинскöй музей чулöтö экскурсияэз, лекцияэз, мастер-класссэз да мöдiк мероприятиеэз, кöдна популяризируйтöны регионлiсь культура да история школьниккез, студенттэз да туристтэз коласын.
Фотолöн источник: Юрлинскöй муниципальнöй округлöн Администрация.
Русский