Гастроллез мунöны Горький нима Коми-Пермяцкöй национальнöй драматическöй театрлöн сцена вылын. Ассиныс программа мыччалiсö ни Перем крайись тöдса театральнöй да творческöй коллективвез. Арся театральнöй сезонлöн медшöр событиеöн лоасö Перемись опера да балет театрись да куклаэзлöн Театрись артисттэзлöн выступленнёэз.
Арнас гастрольнöй показзэз осьтасö Перемись опера да балет театрись артситтэз. Нылiсь выступленнё видзчисьöны сентябрьö. Октябрьын видзöтiссезлö мыччалас спектакллезсö куклаэзлöн Театр. Гастроллес лоасö вежалунся юбилейнöй программалöн торöн, йитöм Коми-Пермяцкöй округлöн сё вокöт.
«Коми-Пермяцкöй округлöн сё во – тöдчана да сьöлöмвöрзьöтана лун быдöс миян регион понда. Сы кежö аркмöтöм мероприятиеэзлöн ыджыт программа, кöдаö пырис и миян тетар. Мийö лöсьöтiмö коми-пермяцкöй да роч вылын постановкаэз, йитöмöсь округлöн юбилейкöт. Колö висьтавны, мый вит во бöрын и миян театр пондас порйöтны 100 во. Öнi ни мийö думайтамö сы йылiсь, медбы чулöтны сiйö сэтшöм жö вылын уровень вылын, кыдз и öння мероприятиеэс», - торйöтчис Коми-Пермяцкöй национальнöй драматическöй театрлöн директор Анатолий Четин.
Праздничнöй мероприятиеэс увья Коми-Пермяцкöй драмтеатрлöн сцена вылын таво мыччасисö ни Перемись кынымкö творческöй коллектив. Видзöтiссез адззылiсö том зрительлöн Театрлiсь да Евгений Панфилов Балетлicь спектакллез, Пермскöй губернскöй оркестрлiсь да Пермскöй краевöй филармониялiсь концерттэз. Артисттэз поздравитiсö округись олiссезöс тöдчана лунöн, пасйисö коланаöн коми-пермяцкöй культуралöн самобытнöй традицияэзлiсь сохраненнё.
Русский