Почётнöй званнё кипода портлö Кудымкарись Татьяна Надымовалö козьналiс Россияись художниккезлöн Союзiсь народнöй искусство сьöртi комиссия. Этö ассяма случай Прикамье понда да шоча быдöс страна понда: одзза воö званнёсö сетiсö 35 кипода мортлö. Татьяна Надымова 30 вося унажык керö симöтiсь берся коми-пермяцкиöй орнаменттэзöн, серпасалö, уджалö графикаöн, небöггезлöн иллюстрацияöн, а сiдзжö велöтö этаö челядьöс да гырись йöз, торйöтчö ныкöт народнöй культура да сылöн традицияэз дынö радейтöмöн.
Признаннё кипода морт получитiс традиционнöй народнöй промыселлэз понда. Сiя кужис öтлаöтны симöткöт уджлiсь важ приеммез искусство вылö öння дзарньöлöн. Сылöн уджжез традиционнöй коми-пермяцкöй серрезöн мыччалiсö Перем край Москваын да мöдiк каррезын выставкаэз вылын.
Талун Татьяна Надымова юралö Кудымкарын «Исток» нима народнöй промыселлэзлöн да ремеслоэзлöн Центрöн, пырö «Художники Пармы» нима Коми-Пермяцкöй творческöй объединеннёö, уджалö художникöн-декораторöн «У Сизимка» нима театрын, лоö членöн кипода морттэзлöн Коми-Пермяцкöй объединеннёлöн, а сiдзö сотрудничайтö П.И. Субботин-Пермяк нима Коми-Пермяцкöй краеведческöй музейкöт да этнокультурнöй центркöт.
Удж коста сiя витiсь лоис Коми-Пермяцкöй округлöн уджжез сьöртi Министерстовлöн премиялöн лауреатöн да кыкись – культура да искусство сфераын Перем крайлöн премиялöн. 2009 воö сылö сетiсö званнё «Народный мастер Пермского края».
Татьяна Надымова не только аркмöтö народнöй творчество сьöртi произведеннёэз, но и торйöтчö опытöн. Сiя чулöтö мастер-классэз челядь понда да гырись йöз понда, велöтö воскреснöй школаэзын, а сiдзжö сотрудничайтö благотворительнöй фондкöт Светлая деревняын, кытöн велöтöны симöтлöн художественнöй обработкаö ограниченнöй вермöммеза отирöс.
«Кöр ме тöдi комиссиялöн решеннё йылiсь, эг вермы видзны гажлiсь синваэз. Званнёыс лоис подтвержденнёöн, мый менам удж да бöрйöм творческöй туй вöлiсö правильнöйöн. Меддона, мый признаннё локтiс Коми-Пермяцкöй округлöн сё воö. Ме радöн торйöтча аслам творчествоöн челядькöт да гырись йöзкöт и одзлань кера удж, кöдö сьöлöмсянь радейта», - торйöтчис Татьяна Надымова.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Русский