2025 вося октяб 19 лунсянь октяб 26 лунöдз Коми-Пермяцкöй национальнöй драматическöй театрын чулалас «Сообщение» нима VII межнациональнöй театральнöй фестиваль. Кудымкарö локтасö театррез Арменияись, Татарстанiсь, Удмуртияись, Карелияись, Марий Элiсь, Ханты-Мансийскöй автономнöй округись да Пермскöй крайись.
Коми-Пермяцкöй театр, кöда видзö йитöт народнöй традициякöт, корö театральнöй сёрнитöм дынö Россияись да зарубежьеись национальнöй театррез. Фестивальнöй программалöн быд спектакль – виль юöр видзöтiсь понда. И сiя лоö вежöртанажык, кöр мунö чужан кыв вылын.
Мыйöн талун олö национальнöй театр, мый вöрзьöтö видзöтiсьöс? Кадсö озö бöрйö. А олансö? Кöсъятö я баитны оланлöн ценносттез йылiсь, бур да умöль йылiсь, испытаннёэз йылiсь, кöдна шедöны торья морт, йöз, нация судьбаын – öтлаын думайтыштны героизм да предательство йылiсь, ёртасьöм да вражда йылiсь, кöдна пыр мунöны миянкöт ордчöн?
Фестивальлöн программа::
- октяб 19 лунö — «Солнце» нима обско-угорскöй йöззэзлöн Театр (Ханты-Мансийскöй автономнöй округ), спектакль «Родной земли напевы. Генезис» (12+);
- октяб 20 лунö — М. Шкетан нима драмалöн Марийскöй национальнöй театр (Республика Марий-Эл), спектакль «Дядя Ваня» (16+);
- октяб 21 лунö — Коми-Пермяцкöй национальнöй драматическöй театр (Пермскöй край), спектакль «Живи и помни» (18+);
- октяб 22 лунö — А. Савин нима драмалöн Лысьвенскöй театр (Пермскöй край), спектакль «Космос» (16+);
- октяб 23 лунö — Г. Игитян Эстетика Национальнöй Центр пыр «Метро» нима Театр (Армения), спектакль «Главное, чтобы не было скучно» (12+)
- октяб 24 лунö — Государственнöй национальнöй драматическöй театр (Республики Карелия), спектакль «Семь сов» (12+);
- октяб 25 лунö — М. Горький нима Сарапульскöй драматическöй театр (Республика Удмуртия), спектакль «Русалка» (12+);
- октяб 26 лунö — Альметьевскöй татарскöй государственнöй драматическöй театр (Татарстан), спектакль «Конокрад» (16+).
Таво медадззаись фестиваль вылын чуалалас онлайн-программа. Видзöтiссез адззылассö «Ромео и Джульетта» (16+) нима спектакльлiсь видеоверсия Республики Карелияись Государственнöй Национальнöй театрлöн да «Лютый» (Явыз) (18+) нима спектакльлöн видеоверсия Альметьевскöй татарскöй государственнöй драматическöй театрлöн. Показзэз бöрын чулалас обсужденнё эксперттэзкöт.
«Таво фестивальлöн медодззаись лоас международнöй статус. Лоасö бура тöдсаöсь да радейтанаöсь видзöтiссезöн коллективвез, а сiдзжö «новичоккез». Коми-Пермяцкöй театр таво участвуйтö конкурснöй программаын. Видзчисямö и тiянöс, дона втдзöтiссез!» — баитö Коми-Пермяцкöй театрлöн юралiсь Анатолий Четин.
Показзэзлöн итоггез бöрын жюри Евгении Тропп, Наталья Каминская, Наталья Жемгулене да Камиля Тукаева составын бöрьяс фестивальлöн Гран-при-лiсь обладательöс да вермиссезöс «Лучшая работа режиссёра», «Лучшая мужская роль», «Лучшая женская роль» да «Лучшая работа художника» номинацияэзын.
Фестивальлöн программнöй директор — Татьяна Тихоновец, РФ-ись культуралöн заслуженнöй работник, театральнöй критик, искусствоведеннёлöн кандидат.
Сiдзжö фестиваль коста чулаласö творческöй пантасьöммез, лекцияэз, мастер-классэз, выставкаэз, Коми-Пермяцкöй округöт экскурсияэз объектов культурнöй да историческöй наследиелöн объекттэз видзöтöмöн, коми-пермяцкöй народлöн культуракöт да традицияэзкöт тöдсасьöмöн.
Фестивальлöн программа да билеттэз teatrkpo.ru сайт вылын. Билеттэз кассаын да тетралöн сайт вылын, сiдзжö «Пушкинскöй карта» нима «Семья»-лöн национальнöй проект сьöртi. Кассалöн телефон: 8 (34260) 4-88-60.
«Сообщение» нима фестиваль лоас Коми-Пермяцкöй округлöн сё во кежö чулöтöм событиеэзлöн линейкалöн торöн да чулалас Перем крайись губернаторлöн да культуралöн Министерство отсöтöн.
Русский