Коми-Пермяцкöй округлöн представителлез мыччасисö тöдчана Россияись финно-угорскöй йöззэзлöн мероприятиеэзын Йошкар-Олаын – «Финно-угорская молодёжь в меняющемся мире: реалии и вызовы» нима III финно-угорскöй йöззэзлöн Всероссийскöй форумын да финно-угорскöй йöззэз Ассоциациялöн VIII съездын. Прикамьеись учёнöйез, велöтiссез да культурнöй деятеллез торйöтчисö быдöс Россияись коллегаэзкöт коми-пермяцкöй традицияэзлöн зорöтöм сьöртi ассяма проекттэзöн, мыччасисö докладдэзöн да лыддöтiсö чужан кыв вылын кывбуррез. «Дона му» нима коми-пермяцкöй деревняэзлöн олан йылiсь проект пасйöм дипломöн томпöлöслöн проекттэз конкурсын.
Форум öктiс 250 участникöс Россиялöн 32 регионiсь да лоис медшöр площадкаöн национальнöй политика сьöртi юасьöммез да Россияись финно-угорскöй йöззэзлöн культура зорöтöм сьöртi. Перем крайсö мыччалiсö куим участница: ПГНИУ-ись велöтiсь да коми-пермяцкöй кыв йылiсь «Лов» нима популярнöй блоглöн автор Екатерина Федосеева, Коми-Пермяцкöй этнокультурнöй центрись специалист Надежда Климова да «Как? Так!» нима Коми-Пермяцкöй округын томпöлöслöн организациялöн юралiсь Ирина Баяндина.
Нiя торйöтчисö инициативаэзöн, кöдна йитöмöсь коми-пермяккез кыв да традицияэз зорöтöмкöт. Екатерина Федосеева висьтасис аслас курс «Коми-пермяцкий язык с нуля» йылiсь, кöда корö томпöлöс велöтны чужан сёрни. Надежда Климова мыччалiс, кыдз этническöй видеоконтент вермас лоны öння инструментöн культуралöн популяризация понда. Ирина Баяндина торйöтчис челядь понда ас йöзлöн кыв да традицияэз велöтöм сьöртi интерактивнöй практикаэзöн.
Форум вылын вöлi пасйöм Кудымкарись «Дона му» нима проект. Коми-пермяцкöй деревняэзлöн олан да т радицияэз йылiсь короткометражнöй фильмммезлöн серия босьтiс II степеня диплом виль медиа сфераын томпöлöс проекттэзлöн III Всероссийскöй конкурс сьöртi. Приз козьналiсö проектлöн юралiсьлö да режиссёрлö Надежда Климовалö.
Сыбöрын пондöтчис финно-угорскöй йöззэз Ассоциациялöн VIII съезд. Сiя чулöтчö öтпыр нёль воö и таво öктiс делегаттэзöс страналöн 40 регионся унажыкись. Перем край мыччалiсö Екатерина Федосеева, Коми-Пермяцкöй этнокультурнöй центрись юралiсь Мария Носкова, образованнёись уджалiсссезлöн квалификация лэбтöм Коми-Пермяцкöй институтiсь юралiсь Татьяна Меркушева, дополнительнöй образованнёлöн Кочевскöй Центрись юралiсь Любовь Утева да «Писатели Пармы» нима литературнöй объединеннёлöн председатель Елена Коньшина. Быдöнныс нiя мыччасисö съездлöн секцияэз вылын, кытöн торйöтчисö образованне да культура сфераын опытöн.
«Современные цифровые технологии, искусственный интеллект и медиаресурсы в сохранении и развитии родных языков» нима секцияын Любовь Утева висьтасис цифровöй технологяэз велöтöмö пыртöм йылiсь. Сёрнитöм коста секцияэзлöн участниккез сетiсö кöсйöм бурсьöтны цифровöй технологияэз сфераын сетевöй взаимодействие опытлöн обмен понда да аркмöтны мероприятиеэзлiсь дайджест. Поэтесса Елена Коньшина участвуйтiс поэтическöй марафонын да лыддьöтiс кывбур коми-пермяцкöй кыв вылын. Мария Носкова торйöтчис Коми-пермяцкöй этнокультурнöй центрлöн опытöн чужан кывлöн зорöтöм сьöртi.
«Форум лоис ассяма площадкаöн сёрнитöм понда: мийö торйöтчимö опытöн, баитiмö традицияэзлöн тöдвылын видзöмлöн актуальнöй проблемаэз йылicь да кылiмö мненнёэз кыдз том лидеррезлiсь, сiдз и пöрисьжыккеслiсь. Быдöс чулалiс öддьöн шоныт да ёртасян атмосфераын, кытöн чуствуйтчис öтувтчöм. Кöсъя, мый одзлань миянöс видзчисьöны виль проекттэз, кöдна вермасö отсавны кольны тöдвылын миян предоккезлiсь самобытность да ловья культура», - торйöтчис Екатерина Федосеева.
Русский