Июль 2 лунсянь июль 6 лунöдз Перемын медодззаись чулалö Россияись антропологгезлöн да этнологгезлöн XVI Конгресс. Таво сiя йитöм Коми-Пермяцкöй округлöн сё вокöт. Программаын - 62 секция да 7 круглöй стол. Öтiк (ыджыттэс коласын) секцияын пондасö баитны коми-пермяккез йылiсь Ураллöн этнокультурнöй пространствоын. Сыын лоас 35 доклад. Асланыс уджжезöн торйöтчасö учёнöйез Перемись, Москваись, Ханты-Мансийскись, Ижевскись да Сыктывкарись.
Исследователлез пондасö баитны быдкодь темаэз вылö – ритуальнöй практикаэзсянь да фольклорсянь кывлöн вежсьöммезöдз. Участниккез мыччаласö коми-пермяцкöй деревняэзö экспедицияисьМузейнöй да архивнöй фонддэзiсь материаллэз, а сiдзжö устнöй источниккезiсь. Тöдчана юасьöмöн лоас – коми-пермяккезлöн самоопределеннё. Исследователлез пасйöны, мый 2005 во бöрын коми-пермяцкöй томпöлöс коласын быдмö позитивнöй этническöй идентификация.
Сiдзжö лоасö докладдэз коми-пермяккезлöн свадебнöй сьыланкыввез да обряддэз йылiсь, Ыджыт лун порйöтöмлöн традицияэз йылiсь да народнöй орсаннэз йылiсь. Медбöрья тема йитöм Коми-Пермяцкöй округын экспедицияэзiсь полевöй материаллэзкöт. Торья вниманнё йитöм витальностькöт – кывлöн жизнеспособностькöт.
Пермскöй исследователлез ордчöтiсö коми-пермяккезлöн 2015 да 2024 воэзся анкетированнёэзiсь даннöйез, анализируйтiсö вежсьöммез и пасйисö, мый колö чулöтны кытшöмкö удж кыв зорöтöм понда.
Конгресс вылын сiдзжö баитасö темаэз вылö, кöдна йитöмöсь этнологиякöт, культурнöй идентичностькöт да межэтническöй процессэзкöт. Конгрессын участвуйтö 1,5 сюрс специалистся унажык Россиялöн 73 регионiсь да 23 странаись.
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Информационнöй справка: Россияись антропологгезлöн да этнологгезлöн Конгресс – ыджыт научнöй форум, кöда чулöтсьö 1995 восянь. Сiя чулалö öтпыр кык во коста Россияись быдкодь каррезын да öктö исследователлезöс быдöс мир пасьта. Участниккез обсуждайтöны уна ассяма темаэз, кöдна йитöмöсь межкультурнöй да межнациональнöй взаимодействиекöт. Таво Конгресс чулалас Перемын. Мероприятиеын участвуйтасö учёнöйез дас российскöй регионiсь да мöдiк странаэзiсь. Ассиныс докладдэз Конгресс вылö ыстiсö Китайись, Индияись, Беларусись, Израились, США-ись, Малиись да мöдiк странаэзiсь исследователлез. Программаын 1500 докладся унажык. Программакöт да докладдэзлöн тезиссэзкöт позьö тöдсасьны Конгресслöн официальнöй сайт вылын: https://xn--2025-43d3d1bzg.xn--p1ai/
Русский