Этновокалистка да «Кай» нима творческöй объединеннёлöн аркмöтiсь Дарья Калина мыччлiс дизайн-коллекция, йитöм коми-пермяцкöй культуракöт. Сыö пырис 13 образ, кöднаын используйтчöны коми-пермяккез традиционнöй паськöмлöн торрез.
Коллекцияын йöрнöссэз, юбкаэз, топпез да корсеттэз. Отделка понда босьтсьöны традиционнöй техникаэз: браннöй вышивка, пестрядь да ручнöй набойка. Кытшöмкö тор паськöмись подлиннöй. Коллекцияын используйтчöны натуральнöй материаллэз – лён да хлопок.
Дизайнер торйöтчö, мый национальнöй торрез – этö вермöм висьтасьны ас йылicь кыввезтöг да не öштыны йитöт вужжезкöт. «Ме кöсйи мыччасьны, торйöтчыны отирсянь. Ме думайтi, мыля бы не керны этö национальнöй идентичность отсöтöн? Эд этö сэтшöм бур: новйыны паськöм национальнöй компонентöн», - торйöтчис Дарья Калина. Дарья Калина.
Идея уджавны этническöй мотиввезöн Дарья Калиналöн аркмис эшö школаын. Сэк этö вöлiсö медодзза пондöтчöммез труддэзлöн уроккез вылын. Перемскöй педуниверситетын велöтчöм коста культура дынö интерес ыждiс и лоис осознаннöй бöрйöмлöн торöн. Дарьяöн керöм моделлез гленитчöны этностиль радейтiссезлö и лоöны поводöн баитны коми-пермяцкöй культура йылiсь.
Унажык сы удж йылiсь позьö тöдны «О любви к коми-пермякам, продвижении коми-пермяцкой культуры и о создании капсулы одежды с коми-пермяцкими мотивами» творческöй пантасьöм вылын «Обряды-наряды» нима фестиваль вылын. Сiя чулалас Перемын июль 6 лунö 18:00 часö эспланада вылын. Регистрация пантасьöм вылö: https://clck.ru/3MpBLd
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во, а Перемскöй крайын 2025 во шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Русский