Кудымкарын эта неделя вылын пондöтчасö öткосат кынымкö театральнöй событие: любительскöй кукольнöй театррезлöн Фестиваль да «Субботин-Пермяк. Мастерские» нима челядь театральнöй творчестволöн II фестиваль. Гöссезöс видзчисьöны дасся унажык спектакль, мастер-классэз, экскурсияэз да режиссёррэзкöт пантасьöммез. Кыкнан событие йитöмöсь Коми-Пермяцкöй округлöн сё вокöт.
Любительскöй кукольнöй театррезлöн Фестиваль (0+)
Лун: октябрь 28 лунö.
Места: Кудымкар, Культурно-деловöй центр.
Культурно-деловöй центрлöн сцена вылын öксясö творческöй коллективвез Перемись, Кудымкарись, Юсьваись, Березникиись да Верещагиноись. Видзöтiссез адззыласö спектакллез, сувтöтöмöсь народнöй историяэз мотиввез сьöртi, тöдасö коми-пермяцкöй сказкаэзiсь геройезöс да тöдсасясö кукольнöй искусстволöн традицияэзкöт. Программаын — народнöй творчество жанра спектакллез, актёрскöй мастерство да сценическöй сёрни сьöртi мастер-классэз, а сiдзжö авторскöй аканнезлöн выставка — тöдса коми-пермяцкöй сказкаэзлöн персонажжезлöн.
Фестиваль лоас площадкаöн творческöй вежсьöм понда да бур вежалунöн челядь понда да гырись йöз понда. Татöн позяс не только видзöтны спектакллез, но и пешлыны асьсö актёрлöн рольын да велöтчыны уджавны театральнöй аканьöн.
«Субботин-Пермяк. Мастерские» нима челядь театральнöй творчестволöн II фестиваль (6+)
Лун: октябрь 30 лунсянь – ноябрь 1 лунöдз.
Места: Кудымкар, М. Горький нима Коми-Пермяцкöй национальнöй драматическöй театр
Театральнöй неделя Кудымкарын одзлань вуджас Коми-Пермяцкöй драмтеатрлöн сцена вылö, кытöн чулалас «Субботин-Пермяк. Мастерские» нима челядь театральнöй творчестволöн II фестиваль. Сыын участвуйтас 12 творческöй коллектив Пермскöй крайись да Ханты-Мансийскöй округись. Том актёррез мыччаласö постановкаэз челядь понда гижиссез произведеннёэз сьöртi, народнöй сказкаэз сьöртi да öння пьесаэз сьöртi.
Фестивальлöн программаын – конкурснöй показзэз, мастер-классэз актёрскöй мастерство, режиссура да сценическöй движеннё сьöртi, а сiдзжö профессиональнöй режиссёррезкöт пантасьöммез да экскурсияэз. Участниккезлiсь уджжез донтасö эксперттэз Москваись, Перемись да Кудымкарись. Конкурс помын сетасö козиннэз «Лучший актёр», «Лучшая актриса», «Специальный приз жюри» нима номинацияэзын, а медшöр вермись босьтас фестивальлiсь Гран-при.
Программалöн медтöдчана тор — Кудымкарскöй округлöн Ошибскöй школаись «Ен из» нима видеостудиялöн участие. Челядь, кинлöн фильммез лоисö ни всероссийскöй да международнöй фестиваллезлöн лауреаттэзöн, керасö документальнöй фильм событие йылiсь и пондасö чулöтны медиаподдержка.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Вежалунся событиеэзлöн программнöй дирекция — Пермский дом народного творчества «Губерния».
Быдöc актуальнöй информация Коми-Пермяцкöй округлöн фестиваллез йылiсь верматö тöдны сайт вылын да социальнöй сеттезын.
Русский