Перемись «Губерния» нима народнöй творчестволöн керкуын Коми-Пермяцкöй округлöн 100 во увья чулалас «Музыка Пармы» нима театрализованнöй концертнöй программа, йитöм коми да коми-пермяккезлöн музыкальнöй культуракöт. Событиеын пондасö участвуйтны Коми Республикаись искусство сьöртi колледжись да культура сьöртi колледжись велöтчиссезлöн своднöй фольклорнöй ансамбль да Коми-Пермяцкöй округись «Пелысёк» нима народнöй вокальнöй ансамбль.
Проект «Музыка Пармы» тöдсöтö публикасö коми йöззэзлöн народнöй музыкалöн да инструменттэзлöн богатöй наследиекöт, осьтö нiйö öння видзöтiсьлö художественнöй да эмоциональнöй формаын.
Лун да кад: октябрь 31 лунö 16.00-сянь (круглöй стол), 18.00-сянь — концертнöй программа.
Места: ПДНТ «Губерния» (Пермь, ул. Советской Армии, д. 4).
16:00 часö пондöтчас круглöй стол проектлöн аркмöтiссезкöт да участниккезкöт, кытöн гöссез тöдасö проектлöн замысел да реализация йылiсь — идеясянь оланö пыртöмöдз, коми народнöй инструменттэзлiсь «золотöй фонд» аркмöтöм йылiсь да проектлöн одзланься олан йылiсь. Татöн мыччаласö представят Александр Забоевлöн народнöй музыкальнöй инструменттэзлiсь выставка, мастерлöн, кöдалöн ассяма уджжез видзöны вежсьытöг ойвывся ремеслолiсь традицияэз да вдохновляйтöны öння музыканттэзöс.
18:00 часö «Губерния»-лöн сцена вылын пондöтчас концертнöй программа. Медодзза отделенинё нуöтас видзöтiссезöс деревенскöй оланö, кытöн Тимофей Иванович, инструменнтэз керöм сьöртi мастер, висьтасьö аслас внуклö Андрюшкалö народнöй инструменттэзлöн аркмöм йылiсь, нылöн шы йылiсь да оланын места йылiсь. Нылöн сёрнитöм йитсьö сьыланкыввезкöт да Коми Республикаись «Колледж искусств»-ись да «Колледж культуры»-ись велöтчиссезлöн своднöй фольклорнöй ансамбльöн мыччалöм сценаэзкöт. Программаын сьывсясö аутентичнöй народнöй сьыланкыввез, частушкаэз да орсаннэз, йитöмöсь традиционнöй инструменттэзлöн шыэзкöт. Ны коласын — чипсаннэз да пöляннэз, пу пöв, сигудöк, брунган, тотшкӧдчан, пу пöлян.
Мöдiк отделеннёын мыччасяс народнöй вокальнöй ансамбль «Пелысёк» Коми-Пермяцкöй округлöн Шадрина деревняись — коллектив, тöдса аслас народнöй да авторскöй сьыланкыввезöн, а сiдзжö фольклорнöй композицияэзöн, кöдна видзöны вежсьытöг коми-пермяккезлiсь музыкальнöй традиция. Ансамбль аркмöтöм 2010 воö да аслас творческöй деятельность коста лоис муниципальнöй, краевöй, всероссийскöй да международнöй конкурссэзлöн лауреатöн. Куим во сьöрна ни коллектив сотрудничайтö «Волга-Волга» нима компаниякöт, пыртö оланö этнотуристическöй программаэз да тöдсöтö гöссезöс ойвывся йöзлöн культураöн да бытöн.
«Музыка Пармы»-лiсь постановка лöсьöтiс творческöй команда режиссёр-постановщик Нина Коленская кипод увтын. Проект вылын сiдзжö уджалiсö звукорежиссёр да видео-контентлöн автор Артём Левко, хореограф Ольга Одинцова, коллективвезлöн юралiссез Надежда Чашникова да Николай Черных. Пыранiн сьöмтöм. Унажык татöн — vk.com/event230485815.
«Музыка Пармы» нима проект аркмöтöм РФ-ись культура сьöртi Министерстволöн грантовöй отсöт увья. Проектлöн аркмöтiсь — ГАУ РК «Центр народного творчества и повышения квалификации» да Коми региональная автономная некоммерческая организация «Центр развития культуры».
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Вежалунся событиеэзлöн программнöй дирекция — Пермский дом народного творчества «Губерния».
Быдöc актуальнöй информация Коми-Пермяцкöй округлöн фестиваллез йылiсь верматö тöдны сайт вылын да социальнöй сеттезын.
Русский