Кудымкар лоис центрöн гожумлöн медчöскыт событиелöн. Карлöн 87 во да Коми-Пермяцкöй округлöн 100 во увья центральнöй площадь вылын пуисö перловкаа тшакьяшыдлiсь 2 173 рекорднöй порция. Этö виль гастрономическöй рекорд, официально гижöм «Интеррекорд» нима агентствоöн да Россияись рекорддэзлöн Реестрöн.
Рекорд вылын уджалiсö кулинариялöн звездаэз: Илья Лазерсон, Ильнур Муртазин, Милан Умичевич да Лариса Плакхина. Кулинарнöй марафон сьöрын видзöтiсö не öтiк сюрс зритель, а угощеннё дöнзис быд мортлö, кин кöсйис пешлыны.
Вежалун, кöда öтлаöтiс
Гастрономия лоис торöн ыджыт торжестволöн, кöда öктiс 12 000 гöсь гöгöр да 700 участникся унажык. Сцена вылын да площадкаэз вылын мыччасис 50 творческöй коллектився унажык, а «Город мастер»-ын уджалiс быдöс округись 65 кипода мортся унажык.
«Акань»: ловзьöм традиция
Вежалуннэз пондöтчисö «Акань» нима национальнöй орсанлöн да орсан культуралöн фестивальсянь, кöда чулалic «59 фестивалей 59 региона» нима краевöй проект сьöртi. Кык лун коста Кудымкарись КДЦ-ын чулалiс аканнезлöн выставка, кукольнöй спектакллез, образовательнöй пантасьöммез да «Подари игрушку» нима акция. Карлöн гöссез ветлöтiсö карöт öтлаын Аканькöт – фестивальлöн героинякöт, челядь тöдвывлöн да коми-пермяцкöй культуралöн пас.
Театр, небöггез да спорт — быдöс öтiк карын
И.Я. Кривощёков нима парк лоис пространствоöн öткоста кынымкö фестиваль понда: театральнöй «Öнас» (Занавес), музыкально-литературнöй «Коми-рыт» да поэтическöй «Ловлӧн бикыв» понда. «Парма» нима стадион вылын чулалiсö спортивнöй вермасьöммез: волейбол, баскетбол, теннис, футбол.
«Гениев По стопам»: историяöн мунöм
Гажа событиеöн лоис «По стопам Гениев» нима театрализованнöй мунöм, йитöм Коми-Пермяцкöй округись тöдчана отиркöт. Куим символическöй колонна мыччалiсö гижисьöс Василий Климовöс, серпасалiссезöс Виталий Оньковöс да Петр Субботин-Пермякöс. Мунöм помассис торжественнöй осьтöмöн площадь вылын.
Ремеслоэз, мода да рытся концерт
Медшöр сцена вылын чулалiс «Живое дыхание старинной традиции» нима гала-концерт öтлаын Сыктывкарись «Гажа гуляночка» нима ансамблькöт да округись артисттэзкöт. «Город мастеров»-ын да «Кипода морт» нима конкурсын гöссез вермисö видзöтны, кыдз керöны ас киöн ассяма берся, пешлыны асьсö ремеслоын да босьтны сувениррез, йитöмöсь округлöн сё вокöт. Кипода морттэз вермасисö куим номинацияын: вязание, ткачество и художественная обработка дерева и бересты.
Рытся программа басöксьöтiсö дефиле «Акань шоу: модная кукла», «Кружево» нима фолк-группалöн мыччасьöм, певица Наталья Шнайдер да шоу-балет «Мята».
«Мийö кöсйимö, медбы День города лоис событиеöн, кöда йитö поколеннёэз, öзтö интерес чужан культура дынö. Программа петiс паськыт, унаслоя да ловья. Эта вежалун быдöс понда – челядь, аймам, томпöлöс, Кудымкарись гöссез да олiссез понда», - пасйис округлöн юралiсь Наталья Сикорская.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Эта во шуöм коми-пермяцкöй кыв Воöн, да вежалунся мероприятиеэс лоисö торöн ыджыт культурнöй программалöн. Вежалунся событиеэзлöн организацияöн да программнöй дирекцияöн занимайтчö Пермский дом народного творчества «Губерния».
Русский