П. И. Субботин-Пермяк нима Коми-Пермяцкöй краеведческöй музейын оссис «Пера Маа отир. Люди Дальней Земли» нима виль экспозициялöн медодзза тор. Видзöтiссез понда оссис «Нижний мир» — археологиялöн, дописьменнöй эпохалöн, сакральнöй символллэзлöн да загадочнöй ритуаллэзлöн пространство.
Вежöм выставка йитöм куим мир йылicь финно-угорскöй мифкöт: увтiсь, шöрöт да вылiсь. Виль музейнöй рассказ, паськöтöм куим этаж вылын, тшöктö ассяма пырöм важ кадö да округлöн культурнöй наследиеö – археологическöй тайнасянь историялöн художественнöй осмысленнеöдз.
Экспозициялöн медодзза торын музейлöн фондiсь редкöй артефакттэз, сiдзжö ассяма адззöмторрез сэтшöм памятниккезiсь, кыдз палеолитическöй стоянка Гарчи, Роданово городище да курганнöй захороненнёэз Великöй переселеннё народов эпохасянь. Экспонаттэз коласын – важ костюммезлöн реконструкция, ювелирнöй украшеннёэз, серебрянöй погребальнöй маскаэз, гуннскöй полихромнöй стильлöн берся, византийскöй да иранскöй керамика. Мукöд торыс лоас мычччалöм медодззаись.
Экспозицияö пырöны интерактивнöй элементтэз: мультимедийнöй заллэз, артефакттэзлöн тактильнöй копияэз, масштабнöй диорамаэз, Прикамьеись кöркöся олiссез бытлöн реконструкции. Торья вниманнё сетöм тотемнöй животнöйез культуралö да финно-угорскöй народдэзлöн олан йылicь дзарньöвлö.
«Мийö керимö медодзза оськöв. Мийö мыччаламö увтiсь мир – ыыджыт туйлöн пондöтчöм. 2026 вося медодзза кварталын мийö осьтамö быдöc музейнöй цикл, кытчö пырö и вылicь мир, йитöм Петр Иванович Субботин-Пермяккöт – серпасалiськöт да коми-пермяцкöй культурнöй наследие öктiськöт», - висьтасис музейлöн директор Елена Дунина.
Реэкспозиция вылын удж мунö 2021 восянь. Проект инициируйтöм «Югöр» нима кудымкарскöй общественнöй организацяöн да чулöтсьö Перем крайись культура сьöртi Министерствокöт, губернаторлöн администрациякöт да округлöн муниципальнöй власттезкöт öтлаын.
Быдöс мероприятиезлöн öтласа бюджет 87 млн руб, кöдна коласicь 35,2 млн сетöм культурнöй инициативаэзлöн Президентскöй фондöн музейлöн реэкспозиция понда.
Научнöй концепциясö керис команда историческöй наукаэз сьöртi доктор Александр Черных кипод увтын, проектлöн куратор да продюсер— Ольга Сафрошенко. Дизайн да художественнöй оформленнё курируйтö Ольга Вологина, а техническöй воплощеннё понда отвечайтö Алексей Путинцевлöн («Батя Кочевар») команда. Световöй оформленнё сьöрын видзöтлöны Антон Аверин да Пётр Стабровский.
«Музейлöн вежöм — этö унажык, чем реновация. Этö коллективнöй пессьöм — олiссезлöн, серпасалiссезлöн, исследователлезлöн, археологгезлöн, проектнöй командаэзлöн. И этö медбур козин округлö сылöн 100 во кежö», — пасйис Татьяна Санникова, ПДНТ «Губерния»-лöн генеральнöй директор, «100-летие Коми-Пермяцкого округа» нима проектнöй офислöн юралicь.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Эта во Перем крайись губернаторöн Дмитрий Махонинöн шуöм коми-пермяцкöй кыв Воöн, да вежалунся мероприятиеэс лоисö торöн ыджыт культурнöй программалöн. Сё во кежö событиеэзлöн программнöй дирекция - Пермский дом народного творчества «Губерния».
Фотографии Дмитрий Маклыгин, Светлана Радченко
Русский