Июль 19 лунö Гайныын, Коми-Пермяцкöй округись медылын районннöй центрын (Перемсянь 355 км), чулалас «Симфония Пармы на земле Перы» нима этнокультурнöй фестиваль. Татöн, Пера-богатырьлöн – коми-пермяцкöй эпосiсь тöдчана геройлöн – чужан му вылын, мыччасяс тöдса аккордеонист-виртуоз Пётр Дранга. Программаын сiдзжö – народнöй ремеслоэз сьöртi мастер-классэз, приключенческöй квесттэз да богатыррезлöн конкурс.
Фестиваль пондöтчас 10:30 часö «Тропою Севера» нима квестсянь Пернаяг урочище вылын. Участниккез вермасö пешлыны «ловья» да «кулан» ва природнöй источниккезiсь да юны туруна чай, пуöтöм бипур вылын.
Лун, кад: июль 19 лунö, 13:00.
Места: п. Гайны, урочище Лугдын.
Гöссезöс видзчисьöны Коми-Пермяцкöй округись, Коми Республикаись да Перем крайись артисттэзлöн выступленнёэз. Лун коста фестивальнöй поляна вылын пондасö уджавны 9 интерактивнöй площадка:
- «Вöрись керку» — гöссез шедасö Пера-богатырь керкуö да лöсьöтасö лепёшкаэз важ коми-пермяцкöй рецепт сьöртi.
- «Сказка ложь, да в ней намёк» — гожся читальнöй зал, кытöн висьтасясö Пера-богатырь йылiсь легендаэз да мыччаласö «Как Пера змея победил» нима кукольнöй спектакль.
- «Беличье гнездо» — ремесленнöй ряддэз да мастер-классэз кыйöм, резьба, ковка да симöттэз кыйöм сьöртi. Сэтöн жö чулалас кипода морттэзлöн керöмторрезлöн выставка-продажа
- «Пера-богатырские забавы» — вермасьöммез вынаэз понда: иззэз чапкалöм, ньöвись лыйсьöм, петляэз чапкалöм да лыжнöй гонкаэз.
- «Лучшая Зарань» — конкурс инькаэз понда, кöдаö öткоста пырöны спортивнöй вермасьöммез да коми-пермяцкöй традицияэз тöдöммез мыччалöм.
- «Сыть да ням» — гастрономическöй зона дед Щукарьсянь чериваöн да рыбацкöй секреттэзöн.
- «Травница-здравница» — площадка туруна чайöн, кытöн тöдiсь Яся висьтасяс веськöтан туруннэз йылiсь, козьналас амулеттэз да чулöтас яблок вылын гаданнё.
- «Забавы русской старины» — народнöй орсаннэз важ дозмукöн: укватöн, нинкöммезöн, чугункаэзöн.
- «Семейный сундук» — квест том гозъя понда: 7 испытаннё, 7 сундук, 7 ключ да öтiк öтласа награда.
Фестивальлöн кульминацияöн лоас «Симфония Пармы» нима концерт Петр Дрангакöт да оркестркöт, а сiдзжö «Пусть поёт душа» нима программа творческöй коллективвезкöт. Помаласö вежалун этно-дискотекаöн да файер-шоуöн.
««На земле Перы» нима фестиваль чулалö Гайнаын быд во, но Коми-Пермяцкöй округлöн сё во кежö мийö решитiмö керны сiйö невна вильмоза. Программа лоис пыдынжык: аркмис унажык интерактивнöй площадка, ремесленнöй мастерскöйез, семейнöй да спортивнöй активносттез. Миянлö колö, медбы гöссез не только видзöтiсö, но и участвуйтiсö – тöдсасисö традицияэзкöт, пешлiсö асьнысö ремеслоэзын да кылiсö ловья йитöт коми-пермяцкöй культуракöт», - пасйис Гайнскöй округись юралiсь Елизавета Шалгинских.
Фестиваль чулöтсьö «59 фестивалей 59 региона» нима проект сьöртi Перем крайись культура сьöртi Министерство отсöтöн. Пыранiн сьöмтöм.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния». сайт вылын да социальнöй сеттезын..
Русский