«Кинкӧ. Путешествие в мифологию коми-пермяков» нима резиденция сьöртi Россияись быдкодь регионнэзiсь 17 серпасалiсь тöдсасисö традиционнöй коми-пермяцкöй миффезкöт да кыдöм сьöртi аркмöтiсö авторскöй произведеннёэз. Вдохновеннёöн лоисö не только лекцияэз да исследователлезкöт пантасьöммез, но и Ваганова деревняö ветлöм, кöдаын, кыдз висьтасьöны асьныс участницаэз, мифологияыс лэбалö руын.
Серпасалiссез тöдсасисö коми-пермяккез мифологиякöт этнографлöн Анастасия Кротова-Гариналöн (кöда уджалiс «Гуд Стори Медиа» нима киностудиякöт «Территория»«Территория» нима тöдса сериал аркмöтiкö) лекцияэз вылын. Сы кипод увтын велöтiсö традиционнöй духхезлiсь образзэз – вöрисьлiсь, суседколiсь, ваисьлiсь – да вильмоза, асмознаныс, адззылiсö нiйö. Местнöй культураö пырöмлöн медбöрья торöн лоис пленэр Ваганова деревняын (Кудымкарскöй округ) – местаын, кытöн миффез, кыдз висьталöны асьныс участницаэз, кылöны руын.
Уна участница шуöны: мифологическöй персонажжез, тöдсаöсь учöтсянь, оссисö виль ладорсянь. Серпасалiсь Лиза Шилькова одзжык лыддис суседкосö лёкöн да полöтанаöн, но öнi адззö сiйö рамöн да заботливöйöн. Арт-резиденциялöн мöдiк участница Ирина Вилесова шуö, мый вöрись лоис сы понда не страшнöй существоöн, а обаятельнöй персонажöн ловья мывкыдöн.
Проектлöн идея шогмис ачыс – кураторлöн творческöй кошшöмись. «Ме кошши серпаслiсьöс, кöда бы вермис мыччавны миффезiсь сценаэз, но эз бы тöд ны йылiсь одзлань. Сiдз аркмис «эффект первого впечатления». Öтлаын София-Кристина Елбазовакöт мийö аркмöтiмö кынымкö серпас – и эта неыджыт затеяись быдмис арт-резиденция», — висьтасьö Анастасия Кротова-Гарина.
Итоговöй выставка оссяс ноябрь 1 лунö — сыö пырасö медбур уджжез, кöдна аркмöтöмöсь коми-пермяцкöй мифологияись мотиввез сьöртi. Проект чулöтсьö «Точка на карте. Точка интереса» нима программа сьöртi Перем крайись культура сьöртi Министерство отсöтöн.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Русский