Кольöм шоччисян луннэзö Коми-Пермяцкöй округлöн юркарын öткоста чулалiсö кык ыджыт событие, йитöмöсь национальнöй культуракöт — форум «Коми мир» да Никольскöй ярмарка. Нiя пырисö Коми-Пермяцкöй округлöн сё волöн да коми-пермяцкöй кывлöн Волöн порйöтöм мероприятиеэз коласö. Нiя лоисö ыджыт лыдаöcь да öктiсö 20 сюрс видзöтiсся унажык.
«Коми мир» нима форум йитiс Перем крайись да Республика Комиись наукалiсь, литературалiсь, искусстволiсь, образованнёлiсь да томпöлöслöн организацияэзлiсь представителллезöс. Сёрнитöмлöн медшöр темаöн лоис челядь да томпöлöс коласын коми кывлöн популяризация. Форум вылö вовлiс Республика Комиись официальнöй делегация öтлаöн Роман Носковкöт – национальнöй политикалöн министркöт.
Программаö пырис образовательнöй лекторий, литературно-поэтическöй рыттэз, мастер-классэз да концерттэз, а сiдзжö Кудымкарын Кудым-Ошлöн аллеяöт музыкальнöй променад.
«Медодззаись öксисö Перемись да Перем округись, Соликамскись, Чайковскöйись коми-пермяцкöй землячествоэзiсь представителлез. Мийö договоритчимö локтан воö öтласа мероприятиеэзлöн быдса цикл йылiсь не только миян округын, но и сы сайын. Миян понда форум - не только кужöммезöн торйöтчöм понда площадка, но и том поколеннёлöн чужан кыв дынö да ас родвуж дынö ловья интереслöн символ», — висьтасисö Коми-Пермяцкöй этнокультурнöй центрын, кöда аркмöтiс мероприятие.
Никольскöй ярмарка, кöда йитöм Тулысся Миколакöт, öктiс Перем крайись да мöдiк регионнэзiсь 20 сюрс гöсся да участникся унажык. Вежалун пондöтчис Никольскöй кафедральнöй соборын Божественнöй литургиясянь, кöда бöрын медодззаись историяын чулалiс крестнöй ход Кудымкарöт.
Парклöн территория вылын уджалiсö тематичесöй площадкаэз: сёйись орсаннэзлöн, самоваррезлöн, русскöй гармошкаэзлöн выставкаэз, «Терем русских игр» нима традиционнöй орсаннэз быдсöн семья понда, ремеслоэз да звонарскöй искусство сьöртi мастер-классэз, коми-пермяцкöй сёяннэзöн гастрономическöй зона. Кипода отир мыччалiсö аскерöм уджжез да висьтасисö коми-пермяцкöй письменность йылiсь.
Сцена вылын мыччасисö фольклорнöй коллективвез да вокальнöй ансамбллез, кöдна коласын — «Шондiбан», «Иваны», «Камушка», «Казаченька» да мöдiк.
««Коми мир» нима форум да Никольскöй ярмарка чулöтöм аркмöтiс ассяма пространство, кытöн öтiклаын пантасьö духовнöй, этническöй да творческöй. Этна событиеэз видзöны интерес Коми-Пермяцкöй округлöн история да традицияэз дынö, сетöны ориентир чужан кывлöн да культуралöн одзланься зорöтöм вылö», — висьталöны мероприятиеэзлöн аркмöтiссез.
Мероприятиеэзлöн аркмöтiссезöн лоисö Русскöй Православнöй Церковьлöн Перемскöй митрополия, Кудымкарскöй епархия, Коми-Пермяцкöй округлöн уджжез сьöртi Министерстволöн, Кудымкарскöй муниципальнöй округлöн Администрация да Перем крайись Губернаторлöн Администрация.
Уськöтамö тöдвылö, мый таво Коми-Пермяцкöй округ порйöтö сё во аркмöмсянь. Сы увья 2025 во Перем крайись губернатор Дмитрий Махонин шуис коми-пермяцкöй кывлöн Воöн. Мероприятиеэз чулöтöмлöн координаторöн лоö ПДНТ «Губерния».
Русский