Футбольнöй клуб «Амкар Пермь» мыччалiс Россиялöн Кубоклöн Пути регионов FONBET нима 2 раундлöн старт кежö форма. Форма йитöм Коми-Пермяцкöй округлöн сё вокöт и мыччалö уваженнё коми-пермяккезлö – кореннöй йöзлö, кöда олö Перемскöй крайын.
Формалöн презентацияын участвуйтiсö коми-пермяккез, «Амкарлöн» да «Академия-Амкарлöн» орсiссез, а съёмкаэз чулалiсö Перемын коми-пермяцкöй богатырльлöн Кудым-Ошлöн мурало дынын да село Архангельскöйын – Прикамьеын коми-пермяцкöй кульутралöн тöдчана центрын.
««Мийö донтамö, мый зорöтöны миянлicm коми-пермяцкöй культура. Öддьöн колана, мый «Амкарись» представителлез локтiсö именно Архангельскöйö да торйöтчисö сэтшöм идеяöн. Татöн миян эм Дом ремёсел, кытöн вились пондiсö чулöтны набойкалiсь важ ремесло. Сiя мыччалöм и командалöн орсан понда формалöн презентацияын. Прикамьеись губернаторлöн Дмитрий Николаевич Махонинлöн уджалан пызан вылын эм коми-пермяцкöй серöн штамп.
Ыджыт гордость сы понда, мый миян «Амкар» нима перемскöй командалöн лоас сэтшöм национальнöй орсан форма» - комментируйтiс Альбина Баяндина, «Ассяма горт» нима национальнöй культуралöн Центрлöн юралiсь.
Форма мыччалöм нёль комплектын: полевöйез понда – сьöд да бежевöй, вратаррез понда – виж да руд. Быдöс формаэз вылын мыччалöм ассяма пассэзiсь коми-пермяцкöй сер - морт, шондi, турун, кöр, кöз, лапа, мужик. Пассэзыс мыччалöны спорт, вöрва да Перем крайлiсь ассяма культура. Джерси керöмась вачкисянаэзöн традиционнöй народнöй косовороткаэз вылö, а сер пуктöмась именно сiя местаö, еытöн миян предоккезлöн вöлiсö киззез да йиэз. Воротник увтын пытшкас Коми-Пермяцкöй округлöн сё во кежö керöм логотип, а быдöс фамиллёэз, номеррез да Перем край серöтöмась ассяма тематическöй шрифтöн колоритöн.
Сьöд рöм гöрд серöн – «Амкарлöн» традиционнöй рöммез – мыччалöны клублiсь традицияэз да принциппез. Бежевöй рöм мыччалö уваженнё предоккезлö, кöдна нешоча новйисö чочком косовороткаэз, но дыр новйöм да шондi вылын удж увья сöстöм йöрнöс нятьöсьмис да вöвлiс бежевöй рöма. Сiя мыччалiс сьöкыт удж ыб вылын, кытöн колiс локны кытшöмкö результат дынö, кыдз и футболын. Вратаррез комплекттэзлöн рöммез мыччалöны Перем крайлiсь вöрва: паськыт виж вöррез да иза руд Уральскöй гораэз.
««Формаыс – коми-пермяккезлö дань уважения. Ciдз мийö колямö бы культурнöй наследие и висьталамö бы сы йылiсь, мый этö не просто традицияэзлöн набор: этö ловья дöра, кыйöм ассяма кылiсь, историяись да вöрвалöн вынö веритöмиcь. Этö вермöм аркмöтны пространство, кытöн том поколеннё вермас велöтчыны и участвуйтны аслас йöз оланын, гордитчыны вужжезнас да адззыны вдохноаеннё аслас культуралöн богатствоын», - пасйöны ФК «Амкар Пермь»-лöн пресс-службаын.
Эта формаын «Амкар» чулöтас футбол сьöртi Россиялöн Кубок FONBET-лiсь матч. Орсан чулалас август 20 лунö, средаö, Нижегородскöй областьын Дзержинскись «Химиккöт». Пантасьöм пондöтчас 19:00 часö Перем сьöртi, а трансляциясö позяс адззывны «МАТЧ Премьер» нима телеканал вылын да «МАТЧ ТВ» нима сайт вылын.
Фотоэзлöн источник: пресс-служба ФК «Амкар Пермь»
Русский