Коми-Пермяцкöй округлöн сё воö Юсьвинскöй округöт маршрут пырис Перем крайись медбур туристическöй проекттэз коласö. Аркмöтiсö сiйö Перемись государственнöй гуманитарно-педагогическöй университетiсь (ПГГПУ-ись) велöтчиссез да велöтiссез. Проект шусьö «От А до КАРа». Сiя лоис вермисьöн öтлаöн сизим мöдiккöт «Путешествие по Пермскому краю» нима региональнöй конкурсын.
Маршруттэз, кöдна петiсö финалö, 2025 вося гожумö лоасö основаöн Перемскöй крайöт путешествиеэз йылiсь дженыт фильммез понда. Видеоэз мыччаласö телевиденнёöт да лэдзасö интернетö.
Мый видзчисьö туристтэзöс «От А до КАРа» нима маршрутöт: «От А до КАРа»:
Архангельскöй посад (Перемсянь — куим час мымда машина вылын), Чинагорт да Дойкар деревняэз. Этö Юсьвинскöй округлöн тöдчана точкаэз. Татöн кольччисö коми-пермяцкöй традицияэз да обряддэз. Маршрутлöн ним – не метафора. Сiя быль пондöтчö «А» шыпаслöн скульптурасянь и помассьö деревняын, нимыс кöдалöн йитöм «кар» кывкöт, вежöртасыс кöдалöн «укреплённое место».
– Архангельскöйын туристтэз орсасö «Туригум» нима ветровöй арт-объект вылын, мунасö серöтöм наличниккеза улицаöт, адззыласö важ Михайло-Архангельскöй вичку да «Седло Ильи Пророка».
– Чинагортын – тöдасö, кыдз киэзöн керöны набойка.
– Дойкарын – ветласö важ чучкöй карö.
Проектлöн аркмöтiссез: ПГГПУ-ись велöтiсь Надежда Трубинова, этновокалистка Дарья Калина да велöтчиссез Инга Тупицына, Дарина Боталова, Карина Чакилёва. Унажыкыс Архангельскöйись
«Мийö одзлань нуöтамö удж Коми-Пермяцкöй округлöн наследие зорöтöмлiсь. Архангельскöйын уджалö центр национальной культуры «Ассяма горт», кöда чулöтö вежалуннэз коми-пермяцкöй традицияэз сьöртi, например, Вежалун Ыджыт лун, «Зажинки» нима медодзза кольталöн вежалун. Миян проект висьтасьö коми-пермяцкöй культуралöн да традицияэзлöн ассямаэз йылiсь», баитö Дарья Калина.
Крайлöн заксобраннёын, кöда чулöтö туристическöй маршруттэзлiсь конкурс, висьтасисö, мый Коми-Пермяцкöй округ, кыдз и пыр, лэбтö интерес.. Таво 221 проектiсь, кöдна локтiсö конкурсö, 16 вöлiсö йитöмöсь округись районнэзкöт. Аркмöтiссез коласын – не только местнöй олiссез, но и командаэз крайлöн мöдiк каррезiсь.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Информационнöй справка: «Путешествие по Пермскому краю» нима конкурс чулöтсьö Пермскöй крайись Законодательнöй Собраннёöн 2016 восянь. Эта кадö аркмöтöм Прикамьеöт путешествиеэз йылiсь 60 фильмся унажык. Нiйö позьö видзöтны ссылкаöт https://zsperm.ru/s1/proekty/karta-puteshestviy/.
Авторы маршрута
Дарья Калина (фото Алексея Гречищева)
Русский