Кольöм луннэзö Кудымкар пöртчис пуан идеяэзöн дозö. Татöн, тöдса серпасалiсь авангадист Петр Субботин-Пермяк олан пассэз сьöртi, ловзис ассяма проект — «ЭтноАвангард» нима фестиваль-лаборатория. 4 сюрсся видзöтiсь, кипода морт да кывзiсь öксис, медбы мöднежа вежöртöтны коми-пермяцкöй наследие да повтöма видзöтны лоан проекттэз вылö. Фестиваль лоис площадкаöн, кытöн традиция дугдiс лоны «музейнöйöн» - сiя пондiс орсны, югьявны виль формаэзöн. Лабораторияэз, выставкаэз, концерттэз, тетральнöй эксперименттэз – быдöс сы понда, медбы придумайтны да реализуйтны виль идеяэз да проекттэз.
Квать творческöй лабораторияын мунiс идеяэзлöн алхимия. Дизайн сьöртi лабораторияын видзöтiсö, кыдз этническöй мотиввез вермасö вуджны öння мерчö да фестиваллезлöн айдентикаö, а медиа-лаборатория кошшис виль форматтэз томпöлöслöн аудитория понда, экспериментируйтiс нейросеттезöн, думайтiс, кыдз керны Кудымкарсö матöнжыкöн да интереснöйжыкöн видзöтiссез понда. Арт-интервенция петiс мастерскöйез сайö карлöн пространствоö арт-интервенция пырйöт, öткоста лэдзис кипода морттэз йылiсь профессиональнöй телеграм-каналлiсь идея.
«Поющая трава» нима музыкальнöй лаборатория Марина крюкова кипод увтын (ансамбль «Репей») öтлаöтiс челядьöс да театрись артисттэзöс, кöдна велöтiсö пöляннэзлiсь орсöм да помалiсö велöтчöм «Ыджыт орсанöн» öтлаын «Шондiбан» нима ансамблькöт. Биа жанра лабораторияын кынымкö лун коста челядь лöсьöтiсö эффектнöй файер-шоу, а музейно-экскурсионнöй прокачка сетiс округись специалисттэзлö виль тöдöммез сы йылiсь, кыдз аркмöтны музейез да турмаршруттэз, керны территория точка притяженияö.
Паськыт аудиториялö мыччалiсö музыкальнöй да театральнöй программа. Коми-Пермяцкöй драмтеатрлöн учöт сцена вылын ловзис «Серебряное копытце» нима сказка Андрей Тетюрин кипод увтын «Карабаска» театрлöн песочнöй анимацияын, а сэсся публика адззылiс «Бесприданница. Островский» нима спектакль детектив жанрын, сувтöтöм Натальея Пахомоваöн.
Фестивальлöн музыкальнöй событиеэз паськöтiсö восприятииелiсь границаэз: Москваись ансамбль «Репей» нуöтiс кывзiссезöс этнографическöй мирö «от востока и до севера», Петрозаводскись коллектив ЯRГАsoundsystem вежис Хлебниковлiсь да Каменскöйлiсь поэзия звуковöй композицияö, Пётр Термен вöзйис «Музыка сфер», а акапелла-бэнд SPOKANKI, «Ну-ка, все вместе!» телепроектлöн финалисттэз да социальнöй сеттезлöн звездаэз, рочöн кö шуны, «сорвали овации». Медбöрья аккордöн лоис «Времена» нима ыджыт музыкальнöй полотно, лöсьöтöм специально «ЭтноАвангард» понда Дягилевскöй фестивальлöн участникöн Петрöн Главатскихöн, «Репей» нима ансамбльлöн да «AGIDEL» нима перемскöй оркестрлöн участиеöн.
«Этноавангард» мыччалiс: Коми-Пермяцкöй округлöн кольöм кад — не просто история, а лоан искусство понда энергиялöн источник. Фестиваль лоис пасöн виль движеннёлöн аркмöмлöн, кытöн традиция да дерзкöй эксперимент мунöны ордчöн. Кöсъямö, мый Субботин-Пермяклöн наследие — это корöм öння йöзöс творчество дынö», — пасйис Татьяна Санникова, ПДНТ «Губерния»-лöн генеральнöй директор.
«Этноавангард» нима фестивалльлöн партнерöн лоис «Люди Дальней земли — пера Маа Отир» нима ыджыт грантовöй проект, кöда чулöтсьö культурнöй инициативаэзлöн реализуемый Президентскöй фонд отсöтöн.
«Этноавангард» нима фестивальлöн аркмöтiсь — ПДНТ «Губерния».
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Вежалунся событиеэзлöн программнöй дирекция — Пермский дом народного творчества «Губерния».
Русский