Август 9 лунö Коми-Пермяцкöй округлöн юркарын öксис унася-уна гöсь страналöн быдкодь регионiсь. Кудымкарын чулалiс йитöм Коми-Пермяцкöй округлöн сё вокöт ТРАМПЛИН нима музыкальнöй фестиваль.
10000 видзöтiсся унажык; 150 участникся унажык — музыканттэз, кипода морттэз, активносттезлöн аркмöтiссез, вузасиссез; 11 фестивальнöй площадка; 8 территорияись 20 музыкальнöй группа; фестивальлöн техническöй службаэзлöн 60 представитель, 30 волонтёр; 3 ведущöй да 8 морт — фестивальлöн оргкомитет.
Фестиваль вылын медодззаись осьтiс ассис биа борддэз сылöн медшöр пас – 70 метрся трамплин-дракон: шоу коста, кöда йитiс бикыввезлicь орсöм да фейерверк, мыччасис медшöр хедлайнер — легендарнöй группа «Ария».
Фестивальлöн специальнöй гöсьöн сьöлöмвöрзьöтана сьыланкыввезöн лоис Саша Цой. А помалiс фестивальнöй программасö «Чёрный вторник» «Сектора газа»-лöн хиттэзöн.
Концертнöй программаын вöлi быдкодь стиль: этно, фолк, джаз, соул, рэп, электроника да авторскöй песня сьывсисö кык фестивальнöй сцена вылын.
ТРАМПЛИН фестлунлöн аркмис и аслас гимн, гижöм öтлаын искусственнöй интеллекткöт да «Альбион» группалöн сьылöмкöт.
Коми-Пермяцкöй округлöн да бокись территорияэзлöн медбур кипода морттэз мыччалiсö ассиныс уджжезнысö ярмарка вылын, орсан площадка тöдсöтiс учöт да гырись йöз коми-пермяккезлöн культураöн ассяма активносттез пырйöт, уналö гленитчис пондывны асьсö средневековöй вермасисьöн. Мистическöй «Гуся ком»-ын позис öктыны туруннэз шуд понда да пиннезöн керны аслыс оберег, музыкальнöй балаганын пондывны орсны быдöс мирись йöзлöн барабаннэз вылын и сэтöн жö видзöтны Петрушкалiсь театр. Челядь серпасалiсö гажа чужöмоккез, а ыджыттэз тэчисö паськöм вылö ассяма принттэз, кöднö керисö ТРАМПЛИН фестлунлöн аркöтiссез. Сапоггез дзоридззезöн, серöмсора гижöммезöн тумба, пистиккезiсь арт-рок-забор, кык мини-ящер, гырись шыпассэз «ТРАМПЛИН», тантамарекска «100лица Коми-Пермяцкого округа» — уна быдкодь фотозона эзö лэдзö гажтöмтчыны некинöс. Позис тöдны и Коми-Пермяцкöй округлiсь история — фотографияэзлöн, документтэзлöн да факттэзлöн выставка сулалiс автограф-сессияэз понда баннер вылын.
Фестивальлöн аркмöтiссез кыдз и пыр козьналiсö видзöтiссезлö козиннэз одзза фестлунсянь медбур фотографияэз понда, стильнöй образзэз понда, медбур видеороликкез понда, а сiдзжö гимннэзлöн конкурслöн участниккезлö да сылö, кин тöдiс быдöс фестивальнöй символикасö.
Ыджыт вежалун колис медбур впечатленнёэз гöссезлö да Кудымкарись олiссезлö, социальнöй сеттезлöнлентаэзын сё эшö гижöны бур отзыввез. А аркмöтiссез, натьтö, думайтöны ни одзланься во йылiсь да аттьöалöны Перем крайись губернаторлiсь Администрация вермöм понда чулöтны сэтшöм ассяма фестиваль!
Фото Андрей Ладановлöн, Анастасия Коньшиналöн, Евгений Климовлöн.
Русский