Коми-Пермяцкöй округын чулаласö яркöй культурнöй событиеэз, йитöмöсь национальнöй традицияэз дынö да творчество дынö радейтöмöн. Август 16 лунö Пешнигортын «Заветный клад» нима вежалун пыртас коми-пермяцкöй обряддэзлöн, ремеслоэзлöн да сьыланкыввезлöн атмосфераö. Öткоста кык мероприятие — «Звонкая песнь пэлянов» да «Ту-ту-турун» нима челядь понда лаборатория — йитöмöсь пöляннэз вылын орсанöн. Коми-Пермяцкöй национальнöй драмтеатрын чулалас «Живая классика» нима режиссёрскöй лаборатория: корöм том режиссёррез мыччаласö спектакллезлiсь эскиззэз фантастика да фэнтези жанррезын.
«Заветный клад» (6+)
Лун да кад: август 16 лунö, пондöтчöм 17:00 часö.
Места: этнопарк «Заветный клад» Пешнигортын, Кудымкарскöй округ.
«Заветный клад» нима вежалун этнопаркын пыртас гöссесö коми-пермяцкöй традицияэзлöн да гижись-фольклорист Василий Климов творчестволöн атмосфераö. Татöн позяс керны обереггез, дозмук, велöтчыны баитны коми-пермяцкöй кыв вылын да йöктыны народнöй сьыланкыввез увтын. Татöн лоас торжественнöя осьтöм виль арт-объект.
Программаын:
- «Помеч» — «Заветный клад» нима этнопарк бурсьöтöм;
- «Горт» нима мастерскöй – гортся берся керöм;
- «Козин» — обереггез сьöртi мастер-класссэз;
- «Сёрнитам и сьылам» — коми-пермяцкöй кыв сьöртi урок;
- «Йöктамö да сьыламö» — быдöс крайись фольклорнöй коллективвезлöн мыччасьöм;
- «Павжун кад» — мастер-класс коми-пермяцкöй сёяннэз керöм сьöртi.
Мероприятие чулöтсьö «59 фестивалей 59 региона» нима проект сьöртi. Пыранiн сьöмтöм.
«Звонкая песнь пэлянов» (0+)
Лун да кад: август 16 лунö, пондöтчöм 12:00 часö
Места: село Юксеево, деревня Пармайлово, Кочевскöй округ, Парк деревянных скульптур
Сiя лунö Парк деревянных скульптур пöртчас ыджыт творческöй площадкаö, кытöн гöссез вермасö пырны коми-пермяцкöй культуралöн атмосфераö. Программаын – пöляннэз вылын орсöм сьöртi, национальнöй сёяннэз керöм сьöртi, паськöм да аксессуаррез набойкаöн серöтöм сьöртi мастер-класссэз. Участниккезöс сiдзжö видзчисьöны «По деревне мы пойдем, что-нибудь да сделаем» нима квест да Паркöт экскурсия.
Фестивальлöн территория вылын пондасö уджавны ремесленнöй зонаэз, кытöн позяс велöтчыны керны пельняннез да пöлянннэз. Активнöй отдыхлöн радейтiссез вермасö участвуйтны традиционнöй орсаннэзын, а выствка-ярмарка вылын лоас мыччалöм декоративно-прикладнöй искусство сьöртi кипода морттэзлöн берся. Вежалун помассяс «Звонкая песнь пэлянов» нима концертно-игровöй программаöн фольклорнöй коллективвез мыччасьöмöн, народнöй сьыланкыввезöн да йöктаннэзöн.
Лаборатория «Ту-ту-турун»
Даты: август 11–14 луннэзö.
Места: Кудымкар, село Пешнигорт, посёлок Берёзовка.
Нёль лун творчестволöн, музыкалöн да ремеслоэзлöн Коми-Пермяцкöй округись учöт таланттэз понда. Лабораторияын öксис 8-17 во ыжда 20 кага, кöдна тöдсасясö коми-пермяккезлöн реликтовöй музыкальнöй инструмент лöсьöтöмкöт – пöлянкöт да велöтчасö орсны сы вылын. лабораториялöн 14 вося да ыджытжык участниккез понда ассяма программа – «Поющая трава» нима лаборатория, кöда чулалас август 21-22 луннэзö «Этно-авангард» нима фестиваль коста.
Мероприятие чулöтсьö «Точка на карте. Точка интереса» нима программа сьöртi Перем крайись культура сьöртi Министерство отсöтöн.
«Живая классика» нима режиссёрскöй лаборатория лаборатория «Живая классика»
Лун да кад: август 11 лунсянь август 16 лунöдз.
Места: Коми-Пермяцкöй национальнöй драматическöй театр.
Корöм том режиссеррез етша кад коста сувтöтöны спектакллезлiсь эскиззэз, кöднö сэсся видзöтö публика да эксперттэз. Уджжез, кöдна понда сетасö бур отзыввез, вермасö лоны вежыштöмöсь, вайöтöмöсь помöдз да пыртöмöсь театрлöн репертуарö, а режисеррез корöмöсь одзза постановкаэз понда. Участниккез коласын — 5 морт:
• Полина Алёхина (Санкт-Петербург), «Стальной сад», А. Азимов произведеннёэзлöн мотиввез сьöртi;
• Анна Морозова (Калининград), А. и Б. Стругацкие «Малыш»;
• Никита Огарков (Москва), С. и М. Дяченко «Луч»;
• Константин Соя (Санкт-Петербург), К. Патерсон «Мост в Терабитию» (Рита Кадацкаялöн инсценировка);
• Ксения Отинова (Кудымкар), Д. Харауэй «Манифест киборга».
Таво лаборатория йитöм литературакöт фантастика да фэнтези жанррезын. Талун нiя направленнёэс öддьöн популярнöйöсь искусстволöн быдкодь виддэзын, но театральнöй сцена вылын мыччасьöны етша. Лабораториялöн эксперттэз театральнöй критиккез Мила Денёва (Москва) да Алиса Фельдблюм (Санкт-Петербург). Режисеррез уджжезлöн мыччалöм чулалас август 16 лунö 12:00 часö. Билеттэз вузассьöны ни.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Фото Алексей Гречищев, Владимир Истомин
Русский