Кольöм шоччисян луннэзö Верх-Иньваын ю дорын (Кудымкарсянь 20 км ылына) чулалiс «Синва на Иньве» нима трибьют-концерт – йитöм ХХ векын тöдчана композиторкöт Александр Клещинкöт. Сылiсь музыкасö эзö орсö кытöнкö 30 во гöгöр.
Перемись «Орфей» нима камернöй оркестр Петр Юрков юралöм увтын медодззаись орсiс 12 номер, кöдна гижöмöсь Александр Клещинöн. Этна произведеннёэс вöлiсö лöсьöтöмöсь «Синва» нима спектакль дынö, кöда медоззаись вöлi сувтöтöм Коми-Пермяцкöйнациональнöй драмтеатрын 1970 воын. Медбöрьись мыччалöм 1994 воö.
Местаыс памятнöй концерт чулöтöм понда бöhqöv ciйöн, мый татöн, легенда сьöртi, Иньва дынын, важынся-важын поздiсис чудь, кöда пондöтiс ассис олансö Пера да Зарань нима мифолологическöй геройезсянь Коми-пермяцкöй драматург Мария Сторожева гижис ны радейтöм йылiсь «Дочь седого тумана» нима поэма. Сы сьöртi вöлi сувтöтöм «Синва» нима спектакль, музыкасö кöда дынö гижис Александр Клещин.
Виль оркестровкасö произведеннё дынö лöсьöтiс Владимир Юрков, Московскöй консерваторияись велöтчись. Öтлаöн оркестркöт вöрва вылын мыччасисö велöтчиссез да велöтiссез А. Клещин нима Кудымкарскöй детскöй школа искусствись. Видзöтiссезöн лоисö 1 сюрс мортся унажык, кöдна коласын вöлiсö и композиторлöн внуккез да правнуккез.
«Медбурыс Клещин музыкаын простота, изящество да напевность. Сiя аутентичнöй. И сыын сылöн медшöрыс. Мийö унажыксö сыись вежöртiмö только татöн – компоизторлöн чужан му вылын», висьтасис дирижер Петр Юрков.
«Концертыс – ыджыт козин миян отир понда, семьялö и аслыс композиторыслö, кöда кöсйис, медбы сылiсь музыкасö орсiсö ыджыт профессионаллэз», - содтiс Лариса Клещина, Коми-Пермяцкöй драматическöй театраись музыкальнöй отделлöн юралiсь.
Концерт чулалiс «Точка на карте. Точка интереса» нима программа сьöртi. Аркмöтiссез кöсйöны, мый проект пондас мунны одзлань – да Клещинлöн музыка пондас кывны частожык. «Именно эта мероприятиеöн мийö осьтiмö программанымлiсь гожумся мероприятиеэзлiсь цикл», - пасйис Марина Славянская, проектлöн исполнительнöй директор.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Информационнöй справка:
«Точка на карте. Точка интереса» нима проектвермис «Пермский край — территория культуры» нима культура сьöртi министерстволöн конкурсын и вайис Кудымкарскöй округлö регионлöн тавося культурнöй столицалicь статус. Проектлöн программаын - спектакль-мюзикл коми-пермяцкöй кыв вылын, арт-резиденция, памятнöй рыттэзлöн галерея, выставкаэз, лекцияэз, кулинарнöй вермасьöммез да уна мöдiк. Программа кыссяс быдöс 2025 во да йитас творческöй отирсö – серпасалiссезöс, скульпторрезöс, дизайнеррезöс, поэттэзöс да музыканттэзöс.
Русский