3 000 литра сур гöгöр, Соликамскись, Очёрись да округись дереняэзiсь 100 артистся да творческöй коллектився унажык, а сiдзжö экскурсия мельница вылö, пекарняö да рудзöга ыб вылö. Быдöс этö öтлаöтiс «Бур сур» нима фестиваль, чулалöм кольöм шоччисян луннэзö Кудымкарскöй округись Мижуева деревняын Коми-Пермяцкöй округлöн 100 во порйöтöм сьöртi.
Национальнöй юанлöн вежалун лоис ыджыт культурнöй событиеöн: сьывсисö коми-пермяцкöй сьыланкыввез, чулалiсö гастрономическöй мастер-классэз, а медшöрыс – быд кöсйись вермис пешлыны сур, керöм важ рецепттэз сьöртi. Гöссезлö медöддьöн гленитчис öрын керöм сур сьöртi мастер-класс, кöр сьыланкыввез коста гöccез керисö быдöс, кыдз одзжык.
Сiдзжö нiя мунiсö интерактивнöй квест-тур: нылö колiс ветлöтны деревняöт – рудзöга ыбсянь да зерносушилкасянь мельницаöдз да горöдз, медбы адззывны юаныслicь быдöс туйсö – шепсянь кружкаöдз.
«Бур сур» нима фестиваль лоис не только юбилейнöй торжествоэзлöн югыт торöн, но и ловья примерöн сылöн, кыдз традицияэз вермöны öтлаöтны поколеннёэз.
«Сур миян пыр вöлi не просто юанöн — сiйö керлiсö вежалуннэз вылö, гöтрасьöммез вылö, касьтiсяннэз вылö. Öнi сы гöгöр быдмис быдса фестиваль. Мийö радöсь, мый миян деревня лоис тöдса сы увья. Отир локтöны, пешлöны, велöтчöны, торйöтчöны, — сiдз традиция олö одзлань», — Марина Сыстерова, Мижуевскöй ДК-ись специалист.
Сур – коми-пермяккезлöн традиционнöй напиток унавося историяöн. Сiйö керöны чужись да бражноись горын ассяма технология сьöртi, кöдö сетöны поколеннёись поколеннёö. Быд хозяйка видзö тöдвылын ассис рецепт. Талун юанлiсь керöм рецепттэз тöдöны унажык пöриссез. «Бур сур» нима фестиваль отсалö кольны тöдвылын важ традицияэз: татöн кужись инькаэз торйöтчöны тöдöммезнаныс томмескöт.
Фестиваль чулалö «59 фестивалей 59 региона» нима краевöй проект сьöртi да пырис Коми-Пермяцкöй округлöн сё вося cобытиеэз коласö. Вежалунся событиеэзлöн программнöй дирекция — Пермский дом народного творчества «Губерния».
Фото: Анастасия Коньшина
Сiдзжö позьö видзöтны ссылкаöт https://disk.yandex.ru/d/Pve1N8E182QjaQ
Русский