Полевöй исследованнёэз чулалiсö «Коми-пермяки в языковом и этнокультурном пространстве Прикамья» проект сьöртi Российскöй научнöй фонд отсöтöн. РАН-лöн Уральскöй отделеннеись да ПГНИУ-ись ученöйез июль шöрын пантасьлiсö Кочевскöй районiсь олiссезкöт, гижисö олан йылiсь сёрни, мифологическöй тексттэз, тöдсасисö округись коми-пермяккезлöн да роччезлöн традицияэзöн, медбы кольны ассяма культурнöй наследие одзланься поколеннёэзлö.
Кочевскöй районiсь Пелымын, Кузьминоын да Петуховоын ученöйез öктiсö олiссезлiсь серни да фольклор, гижисö коми-пермяккезлicь культурнöй традицияэз. Сернитöммезлöн медшöр участниккез – пöрись олiссез, кöдна баитöны коми кыв вылын, но ученöйез сiдзжö баитöны и томпöлöскöт. Темаэз, кöдна колöны исследователлезлö, - национальнöй кухня, традиционнöй паськöм, календарнöй да бытовöй обряддэз, местнöй вöрва.
Экспедицияэзлöн медшöр могöн лоö öктыны материаллэз хрестоматия понда, кöдаö пырасö диалектнöй тексттэз да аудиоприложеннё. Быд морт вермас не только лыддьöтны, но и кывзыны кыв вылын баитiсьлiсь аутентичнöй сёрни. Экспедицияын öктöм материаллэз сiдзжö пырасö «Словарь хрононимов» нима небöгö, кöдаын лоасö мыччалöмаськоми-пермяккез вежалуннэзлöн народнöй ниммез.
Проектлöн юралiсь профессор Ирина Ивановна Русинова висьтасис, мый öктöм сведеннёэз одзлань пондасö пырны кывчукöррезö, атлассэзö, фольклорнöй тексттэзлöн сборниккезö.
Экспедициялöн участниккез коласын – Екатерина Федосеева, ПГНИУ-ись велöтiсь да «Лов» нима коми-пермяцкöй кыв йылiсь научно-популярнöй блоглöн автор. Сiя гижö кандидатскöй диссертация, кöда йитöм коми-пермяцкöй
«Кольны, пасйыны сiйö, мый лоö вунöтöмöн ни, особенно кыв да традицияэз, кöднöн коми-пермяккез öнöдз эшö бура торйöтчöны, - миян уджлöн медшöр мог. Быд поездка содтö миянлö ассяма материал, отсалö кольны культуралiсь да кывлiсь богатство одзланься поколеннёэз понда», - висьтасис Екатерина Федосеева.
Проект сьöртi экспедицияэз чулöтсьöны мöдöдз во. Одзза воö учёнöйез кыкись ветлiсö Коми-Пермяцкöй округись лунвывся районнэзö, а таво велöтiсö сылiсь ойвывся торсö.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Эта во шуöм коми-пермяцкöй кыв Воöн, да вежалунся мероприятиеэс лоисö торöн ыджыт культурнöй программалöн. Вежалунся событиеэзлöн организацияöн да программнöй дирекцияöн занимайтчö Пермский дом народного творчества «Губерния».
Русский