Сiя пондöтiс ассис удж Юсьвинскöй округись Пожваын — Камалöн живописнöй берег вылын, Перемсянь 285 км. Гостиница POZHVA панталiс медодзза гöссезöс тавося июльын. Зданнёыс оформитöм XIX векся кад моз и бура лöсялö бокись вичкулöн архитектуракöт да посёлоклöн мöдiк историческöй постройкаэзкöт. Проектлöн инвестор, бизнесмен Тихон Корякин, висьталö, мый гостиницалöн осьтöм вермас лоны дополинтельнöй стимулöн Пожваын да и быдöс Коми-Пермяцкöй округын туризмлöн зорамöмлö.
Гостиница осьтiсö реконструируйтöм зданнёын. Торья номеррез керöмась XIX векся стильын – мебельöн «под старину», серöтöм текстильöн да декорöн, кöдна аркмöтöны сiякадся атмосферу. Проживаннёлöн донö пырö завтрак, доныс — 1 240 рубсянь.
Проживаннёся отель чулöтö Пожваöт да важ Свято-Троицкöй вичкуöт экскурсияэз, вöрва вылын йогаöн занятиеэз, стилизованнöй фотосессияэз да велосипеднöй прогулкаэз. Этна активносттес медбура гленитчöны туристтэслö, кöдна интересуйтчöны этнотуризмöн да историяöн. Августын помассис гостиницалöн техническöй оссьöм да пондiс уджавны. Эта коста сыын сувтчылiсö ни путешественниккез Москваись, Екатеринбургись, Перемись да мöдiк каррезiсь.
Проектлöн аркмöтiсьöн да инвесторöн лоис Тихон Корякин. Кыдз висьталö бизнесмен, сiя учöтсянь чулöтiс уна кад эта поселокын и пыр кылiс кытшöмкö ассяма йитöт этна местаэзкöт. «Пожва — колана историческöй центр, кытöн кольччисö важкадся зданнёэз да культурнöй памятниккез.
Гостиницалöн осьтöм Коми-Пермяцкöй округлöн сё воö лоö местнöй культура да история дынö уваженнелöн пасöн, а сiдзжö способ вайöтны дзарньöв регионлöн ассяма наследие дынö. Эта решеннё вöлi йитöм и кöсйöмöн аркмöтны виль рабочöй местаэз местнöй олiссез понда, а сiдзжö пуктыны пай Пожвалöн зорöтöмö. Прект чулöтсьö, медбы зорöтны поселоклiсь туризм да аркмöтны вермöммез трудоустройство да местнöй производство понда», - пасйис Тихон Корякин.
Перспективаын гостиничнöй комплекслöн владелец мöдö аркмöтны Пожваын «музей под открытым небом», паськöтны услугаэзлiсь да туристическöй маршруттэзлiсь спектр, спа-программаэз да тематическöй туррез, йитöмöсь Коми-Пермяцкöй округалöн историякöт да культуракöт, содтöмöн.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Быдöc актуальнöй информация Коми-Пермяцкöй округлöн фестиваллез йылiсь верматö тöдны сайт вылын да социальнöй сеттезын.
Русский