Коми-Пермяцкöй округын оссис «Блогеры культуры» нима творческöй лаборатория - «Точка на карте. Точка интереса» нима образовательнöй программалöн тор, сiя реализуйтчö «Пермский край — территория культуры» нима проект сьöртi. Блогеррезöн асьнысö пешласö Кудымкарскöй округись 15 олiсь 50 вося пöрисьжык. Нiя велöтчасö социальнöй сеттезын уджалöм навыккезö, медбы висьтасьны коми-пермяцкöй культура йылicь.
«Проект сетас не только техническöй навыккез – кыдз снимайтны, монтируйтны да гижны тексттэз, - но и вдохновеннё. Лабораториялöн задача – отсавны участниккезлö баитны чужан мулöн культура йылiсь повтöг, ассянь, серöмсорöн да шоныта. Эта вермöм кывны гöлöс нылiсь, кин олiс олан, öктiс опыт – и öнi вермö торйöтчыны сiйöн медиаöт. «Блогеры культуры» - не возраст йылicь. Сiя олан йылiсь, кöда мунö одзлань, вильö велöтчöм да лоны кылöмöн кöсйöм йылiсь», - висьталö «Блогеры культуры» нима лабораториялöн юралiсь Елена Истомина.
Лабораториялöн участниккезöн лоисö 15 морт быдöс Коми-Пермяцкöй округись. Ны коласын – не только культураын уджалiссез, но и одзза кадö велöтiссез, общественнöй деятеллез, нельки налоговöй инспектор да ОВД-лöн сотрудник. Нiя мунöны мастер-классэз социальнöй сеттезын удж сьöртi: контент-план аркмöтöм, тексттэз гижöм да фотографиялöн основаэз, велöтчöны видеосъемкаö да монтажö. Занятиеэз чулöтöны Перемись да Коми-Пермяцкöй округись эксперттэз. Программаын – тöдчана блогеррезкöт пантасьöммез: Белоевоись Алина Климовакöт да «Гуляев по Перми» нима проектлöн авторкöт, Евгений Гуляевкöт..
Марина Радостева, «Блогеры культуры» нима лабораториялöн участница, уджалö «Родничок» нима клублöн юралiсьöн Быстрый нима посёлокын (Кудымкарскöй округ). Сiя нуöтöПросто о Коми округенима видеоблог. «Ме – кореннöй коми-пермячка. Радейта ассим му и кöсъя, медбы сы йылiсь тöдiс унажык морт. Мийö велöтчамö колана навыккезлö: снимайтны видео, гижны тексттэз, сёрнитны аудиториякöт, тöдсасьны смартфонлöн вермöммезöн. Таво уна быдкодь событиеэз Коми-Пермяцкöй округлöн сё во увья, и ме мöда ветлöтны мероприятиеэз вылö да снимайтны интереснöй материал. Сэсся кера мыйкö вильö – меным öддьöн гленитчö нуöтны блог, и ме мöда зорамны сэтöн одзлань», - висьтасьö Марина Радостева.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во.
Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн.
Справочнöй информация
«Точка на карте.. Точка интереса» нима проектвермис «Пермский край — территория культуры» нима культура сьöртi министерстволöн конкурсын и вайис Кудымкарскöй округлö регионлöн тавося культурнöй столицалicь статус. Проектлöн программаын - спектакль-мюзикл коми-пермяцкöй кыв вылын, арт-резиденция, памятнöй рыттэзлöн галерея, выставкаэз, лекцияэз, кулинарнöй вермасьöммез да уна мöдiк. Программа кыссяс быдöс 2025 во да йитас творческöй отирсö – серпасалiссезöс, скульпторрезöс, дизайнеррезöс, поэттэзöс да музыканттэзöс. Пырö «Точка на карте. Точка интереса» нима проектлöн социальнöй сеттезö: «Точка на карте. Точка интереса»:
ТГ-канал — https://t.me/kudymkar2025
«ВКонтакте» — https://vk.com/kudymkar2025
«Одноклассники» — https://ok.ru/group/70000032243737
Контактöй морттэз йитöт понда::
8 912 060 80 90, Дина Полина,
Коми-Пермяцкöй округлöн сё во кежö проектнöй офислöн пресс-служба
8 908 245 50 04, Елена Истомина, «Блогеры культуры» (проект «Точка на карте. Точка интереса») нима лабораториялöн юралiсь
Русский