Фотографияэз вылын — сёяннэз, скöдна учöтсянь тöдсаöсь коми-пермяккезлö, мыччалöмась öннямоз. Шыд пиканнэзiсь, шыдöса шаньгаэз, кулиггез да мöдiк традиционнöй чöскыттор проект понда лöсьöтiс шеф-повар Константин Мехоношин да сылöн мама Елена Мехоношина. Выставка йитöм Коми-Пермяцкöй округлöн 100 вокöт да мыччалö, коми-пермяккезлöн ассяма кухня вермö вдохновляйтны и талун.
Быд сёянын — дикороссэз: туруннэз, ягöддэз да тшаккез, кöднö важын ни заптывлiсö Коми-Пермяцкöй округын. Фотографияэз вежöны быдпырся сёян яркöй арт-объекттэзö, отсалöны адззывны традиционнöй кухнясö не только кыдз оланлöн тор, но и кыдз культурнöй наследие.
Фотовыставка медодззаись вöлi мыччалöм Перемын «Дикоросы» нима фестиваль вылын, и сiя гленитчис отирлö. Öнi экспозиция оссис Кудымкарын, шедны сы вылö вермö округись быд олiсь да гöсь. Аркмöтiсьöн лоис Пермский дом народного творчества «Губерния». Фотографияэзлöн автор — Арсений Плешаков.
Выставка осьта быдöнныслö «Мама Лена» (ул. Калинина, 35) кафелöн уджалан кадö. Сёяннэзлöн рецепттэз, мыччалöмöсь фотографияэз вылын, позьö адззыны Коми-Пермяцкöй округлöн 100 во кежö аркмöтöм официальнöй пабликын ссылкаöт.
Уськöтамö тöдвылö, мый таво Коми-Пермяцкöй округ порйöтö аркмöмлiсь сё во. Сы увья 2025 во Перем крайись губернаторöн Дмитрий Махонинöн шуöм коми-пермяцкöй кыв Воöн. Сё во кежö событиеэзлöн программнöй дирекция - Пермский дом народного творчества «Губерния».
Быдöc актуальнöй информация Коми-Пермяцкöй округлöн фестиваллез йылiсь верматö тöдны сайт вылын да социальнöй сеттезын.
Русский