Перемскöй крайись культуралöн Центрлöн Кудымкарын вося удж коста чулалiс 20 мероприятиеся унажык — творческöй лабораторияэзсянь ыджыт фестиваллезöдз. Медшöррес коласын — Александр Клещинлöн «Синва на Иньве» нима трибьют, танцевальный баттл «Туримоль», гастрофестиваль «Коми ели», фестиваль «Ночью на Куве» да «Культовые люди» нима пантасьöммезлöн серия. Программа, йитöм Коми-Пермяцкöй округлöн сё вокöт, отсалic вильсьöтны общественнöй пространствоэз да акрмöтны виль культурнöй проекттэз. Мероприятиеэзлöн участниккезöн да видзöтiссезöн лоис 10 сюрс мортся унажык.
Пом лунö карлöн олiссез да гöссез уськöтiсö тöдвылö волiсь медшöр событиеэз да тöдсасисö проекттэзöн, кöдна аркмöтöмöсь программа сьöртi. «Финальный аккорд „Синвы“. Музыка Легенды» встреча-эпилог вылын мычалiсö музыкальнöй треккез, гижöмöсь спектакль понда. «Ту-ту-турун» нима лабораториялöн участниккез орсiсö композицияэз пöляннэз вылын.
Программа коста сiдзжö презентуйтiсö арт-тропа «Чуды всюду». Кудымкарлöн улицаэз вылын сувтöтöмась бронзовöй скульптураэз, мозаика, барельеффез да керамическöй объекттэз, керöмöсь Кудымкарись, Перемись да Санкт-Петербургись художниккезöy да вдохновлённöйöсь гижись да фольклорист Василий Климов творчествоöн. Маршрут мунö Культурно-деловöй центрсянь Лешöй скульптураöдз да Ö шыпасöдз и пыртö ас пытшкас сизим объект.
«КалиТОЧКА» нима дизайн-экспедициялöн участниккез — Коми-пермяцкöй профессиональнöй колледжись велöтчиссез да велöтiссез öтлаын Шадрина деревняись олiссезкöт — мыччалiсö керöм «гостеприимный» забор.
««Точка на карте. Точка интереса» программалöн быдöс мероприятиеэз вöлi аркмöтöмась специально сылöн моггез увья. Во коста мийö осьтiмö ас понда куим виль территория. Миян территорияэз ассямаöcь, а вöрва вермас лоны миян мероприятиеэзлöн соучастникöн. Например, Кува посадын фестиваль кольччас тöдвылын медромантичнöй моменттэзöн. Верх-Иньва посадын мыссэз фон вылын сьывсисö ассяма произведеннёэз композиторлöн Александр Иванович Клещинлöн. Мийö осьтiмö деревня Шадрина, кытöн Коми-Пермяцкöй профессионально-педагогическöй колледжись велöтчиссез отсалiсö олiссезлö басöксьöтны деревнялiсь территория. Эта понда мийö аркмöтiмö виль дизайн-код, и олiссезлöн керкуэз гöгöр аркмис вит виль решеннё», — висьтасис программалöн исполнительнöй директор Марина Славянская.
Уськöтамö тöдвылö, мый 2025 воö Коми-Пермяцкöй округ порйöтö аркмöмлiсь сё во. Сы увья эта во шуöм коми-пермяцкöй кыв Воöн, да вежалунся событиеэз лоисö ыджыт культурнöй программалöн торöн. Вежалунся событиеэзлöн программнöй дирекция — Пермский дом народного творчества «Губерния».
«Точка на карте. Точка интереса» нима программа чулöтсьö Перемскöй крайись культура сьöртi Министерство отсöтöн.
Быдöс акутальнöй информациясö Коми-Пермяцкöй округлöн сё вося фествиаллез йылiсь верматö тöдны сайт вылын да социальнöй сеттезын..
Русский