Коми-пермяцкöй гижись и фольклорист
Чужис 1927-öт вося март 20-öт лунö Кудымкарскöй районiсь Заречный Пешнигорт деревняын. Велöтчис шöрöт школаын, а сэсся – педучилищеын, кöдö колiс кольны сiйöн, мый эз вöв сьöм. Великöй Отечественнöй война коста уджалiс колхозын. Сылöн медодзза кывбуррез петicö 1956-öт воö «По Ленинскому пути» нима газетаын. А нёль во бöрын лэдзис ни кык небöг: «Коми-пермяцкое народное устное творчество» и «Сломанная ветка» нима висьттэзöн сборник. Уджалic корреспондентöн Кудымкарскöй радиовещаннё редакцияын, вöлi корректорöн, а сэсся – Коми-Пермяцкöй книжнöй издательстволöн редакторöн.
Сiя гижис аслас деревня йылiсь да Коми-Пермяцкöй округись йöзлöн традицияэз йылiсь. Босьтiс окружнöй премия коми-пермяккез йылiсь двухтомник понда. Гижис поэт, прозаик, драматург, фольклорист кывбуррезöн сборниккез коми да роч кыввез вылын, висьттэзöн небöггез, роман, фольклорлöн двухтомник, кынымкö пьеса.
Василий Васильевичлöн эм званнё «Заслуженный работник культуры РФ», округлöн почётнöй гражданин. Ciдзжö сiя «Заслуженный деятель культуры РСФСР», проза сьöртi М. П. Лихачёв нима окружнöй Литературнöй премиялöн да поэзия сьöртi А. Н. Зубов нима окружнöй Литературнöй премиялöн лауреат. Сылö вöлi козьналöм культура да искусство сьöртi Пермскöй крайлöн премия. Кватись сiя вöлi национальнöй культура да искусство сьöртi Пермскöй крайись Коми-Пермяцкöй округын удж сьöртi Министерстволöн премиялöн лауреат.
Гижись мунöс оланiсь 2020-öт вося апрель медодзза лунö. Сiя керис ыджытся-ыджыт удж культура понда – сы гижöммезiсь позьö тöдны коми-пермяккез олан йылiсь, велöтны крайлiсь история.
Русский