Кудымкарын март медодзза лунö Коми-Пермяцкöй округлöн сёвося вежалунлöн мероприятиеэз коста чулалiс «Ыджыт Масленича», кöда öтлаöтiс карись олiссезöс, Перем крайись да мöдiк пельöссэзiсь гöссезöс. Вежалун сувтöтiс рекорд артисттэз да участниккез лыд сьöртi.
Эта лунö карлöн площадь вылын уджалiсö орсан да вузасян площадкаэз, мыччасисö музыканттэз, позис пешлыны национальнöй кухня. Сцена вылын сьылiсö округись фольклорнöй да этнографическöй ансамбллез, Перемись, Березникиись, Чайковскöйись, Верещагинаись, Перемскöй районiсь, Удмуртияись творческöй коллективвез. Корöм гöссезöн лоис Санкт-Петербургись фолк-группа «Отава Ё». Быдöсыс концерт вылын да творческöй постановкаэзын участвуйтiс кытöнкö 500 профессиональнöй да самодеятельнöй артист. Видзöтiссес вöлiсö 10 сюрс морт гöгöр.
Уськöтамö тöдвылö, мый таво округись олiссез порйöтöны сылiсь сё во, а крайлöн губернатор Дмитрий Махонин шуис сiйö коми кыв воöн. Быдöс округ пасьта чулöтсясö культурнöй, спортивнöй, образовательнöй событиеэз.
Русский