Коми-Пермяцкöй этнокультурнöй центр Кудымкарын осьтiс набор коми-пермяцкöй кыв велöтöм сьöртi онлайн-школаö. Велöтчöм чулалö дистанционнöя, сыö вермöны пырны быдвося да быд регионicь участниккез. Инициатива йитöм Коми-Пермяцкöй округлöн сё вокöт да Перем крайын коми-пермяцкöй кывлöн воöн. Сылöн мог – кольны национальнöй культура да зорöтны интерес чужан кыв дынö.
Занятиеэз пондасö чулöтсьыны öтпыр неделяö велöтiсь да кыв вылын баитiсь Анастасия Салтанова кипод увтын. Курс коста кывзiссез тöдсасясö коми-пермяцкöй кывлöн ассяма торрезкöт, велöтчасö правильнöя висьтавны шыэз, лыддьöтны да аркмöтны кокнит фразаэз да тексттэз. Программа пондöтчиссез понда и оз кор кытшöмкö лöсьöтчöм. Заявкаэз видзчисьöны октябрь 15 лунöдз. Занятиеэз пондöтчасö октябрь 20 лунсянь.
«Чужан кыв аркмöтö личность, олан вылö дзарньöв да мортлiсь самосознаннё, отсалö сылö вежöртны асьсö аслас увтырлöн торöн. Сiйöн учöт йöззэзöн кыв зорöтöмлöн ыджыт значеннё. Курс чулöтсьö национальнöй кыв да сы носителлезлöн культура зорöтöм понда», — висьталö Коми-Пермяцкöй этнокультурнöй центрлöн юралiсь Мария Носкова.
Гижсьыны занятиеэз вылö позьö телефонöт +7 (342) 604-58-60 или «ВКонтакте»-ын велöтiсьлö сообщеннёэзöт Анастасии Салтановой.
Велöтны коми-пермяцкöй кыв позьö кынымкö велöтiськöт да кыв носителлезкöт. ПГНИУ-ись велöтiсь Екатерина Федосеева аркмöтiс авторскöй онлайн-курс «Ловчир», пондöтчиссез понда, кöда отсалö велöтны кыв «с нуля». Этновокалистка да «КАЙ» нима творческöй объединеннелöн юралiсь Дарья Калина чулöтö индивидуальнжq онлайн-занятиеэз, кытöн кыв велöтöм йитсьö коми-пермяцкöй традицияэзö да фольклор пырöмкöт.
Русский